Dili (timorpost.com)—Eskritór Luis Cardoso timoroan hetan kondekorasaun medalla Orden Kolar Timor-Leste husi Prezidente Repúblika (PR) Jose Ramos Horta.
Objetivu husi kondekorasaun ne’e rekoñese hikas eskritór nia serbisu literáriu no ninia papél iha luta ba autodeterminasaun nasaun nian.
“Priviléjiu boot ida mai ita bele lori hikas fali ita nia eskritór koñesidu timoroan “Takas”, ne’ebé hala’o nia knar hanesan mós ho eskritór sira seluk iha nasaun CPLP nia laran”. Dehan PR iha Salaun Prezidensiál Bairo-Pite.
Iha serimónia ne’e, Xefe Estadu hanoin fila-fali papél literáriu Luis Cardoso nian durante luta ba independénsia, períodu ne’ebé nia sai nu’udar reprezentante Konsellu Nasionál Rezisténsia Maubere (CNRM-sigla portugés) iha Portugal bainhira nia servisu diretamente, ho sira seluk, ho nia rasik Ramos-Horta.
“Takas orgullu ho ita, tanba bele aumenta ona ita nia koñesimentu ba literatura kultura timor nian. Ita tenke insentiva leitura liuhusi eskritór ‘Takas’. Ita mós tenta intensiva joven sira para hatoman-an iha kultura lee nian”. Hatete Prezidente Horta.
Iha fatin hanesan, eskritór “Takas”, sente priviléjiu boot tebes ba governu Timor-Leste ne’ebé mak bele fó ona kondekorasaun medalla Orden de Timor ba nia.
“Ha’u seidauk halo buat barak ba ha’u nia nasaun durante tinan ruanulu ne’e, maibé liu husi ha’u nia eskrita sira bele kontribui ona ba dezenvolvimentu nasaun Timor-Leste”. Nia rekoñese.
Atu rekorda fila fali katak, Luis Cardoso hanesan eskritór timoroan dahuluk ne’ebé hetan rekoñesimentu Prémio Oceanos 2021 ne’ebé hala’o iha Brazil.
Eskritór timoroan ne’e mós hakerek ona livru lubuk mak hanesan; Crónica de Uma Travessia (1997), Olhos de Coruja Olhos de Gato Bravo (2002), O Plantador de Abóboras, no seluk tan.
840 total views, 6 views today
