DILI, (timorpost.com) — Sekretáriu Estadu ba Ensiñu Sekundáriu no Eskola Téknika Vokasionál (SEESETV), Domingos Lemos Lopes, hatete, Governu Konstitusionál dasia (IX) liuhosi Ministériu Edukasaun iha ona planu atu halo mudansa ba manuál merenda eskolár.
“Ministériu Edukasaun iha ona hanoin ruma atu halo mudansa ba Manuál merenda eskolár atu bele hasa’e labarik sira-nia nutrisaun ne’ebé mak di’ak ba ita-nia labarik no liuliu eskolár sira para atu aproveitamentu orsamentu ne’ebé investimentu husi governu ba eskola sira, hodi nune’e labarik sira aproveita ho di’ak,” Sekretáriu Estadu SEESETV, Domingos Lemos Lopes, informa ba jornalista sira iha ME, Vila-Verde, Tersa (21/11/2023).
Tanba ne’e, Sekretáriu Estadu ne’e husu ba Diresaun Mereda atu akompaña prosesu merenda atu nune’e implimenta tuir regra ne’ebé mak iha.
“Ita husu diskulpa hakarak ka lakohi, liuliu Diresaun Merenda Eskolár nian favór ida, durante prosesu tomak ha’u hanoin akompaña mós, liuliu iha eskola sira, maske programa ne’e la’os tama iha Ministériu Edukasaun no Estatál nian, maibé iha obrigasaun morál ida, tanba Estadu ne’e kabe mós ba Ministériu edukasaun nian responsabilidade,” nia afirma.
Tuir nia, banhira implimentasaun merenda eskolár mak la tuir planu ka regra ne’ebé iha, impaktu ne’e ba iha Ministériu Edukasaun.
“Ita lakohi osamentu iha fatin ida, depois ita lakohi toma responsabilidade ba situasaun sira ne’e hotu, husi impaktu bo’ot ne’e ba iha Ministériu Edukasaun. Husu ita hotu-hotu atu iha responsibilidade morál, atu nune’e bele akompaña situasaun tomak ba implementa merenda eskolár ne’e”, nia hatete.
Tanba, bainhira implementasaun merenda eskolár iha eskola sira ladún di’ak, ne’e mós sei fó impaktu ba responsabilidade Ministériu Edukasaun nian.(*)
522 total views, 9 views today
Bele hare Video Seluk :
Subscribe to Timorpost
