Dili (Timor post.com)—Ministériu Edukasaun (ME) ajenda ona iha planu konstrusaun harii edifísiu foun rua ba Eskola Bázika Filial Balibar.
Asuntu ne’e hato’o husi Sekretáriu Estadu ba Ensinu Sekundáriu no Eskola Téknika Vokasionál (SEESETV), Domingos Lemos Lopes ba jornalista sira hafoin hala’o vizita ba Eskola Bázika Filial Balibar, Tersa, (21/11).
“Kondisaun eskola refere grave tebes. Iha loron hirak liu ba ekipa mai halo verifikasaun no ohin ita mai fali hodi haree direita katak eskola refere iha kondisaun grave tebes”. Dehan Domingos Lemos Lopes.
Sekretáriu SEESETV haktuir, eskola ne’e nia kondisaun grave tanba kauza husi rai halai tinan ida liu ba.
“Husi situasaun refere, parte Ministériu Edukasaun tau ona iha ajenda konstrusaun nasionál sei harii edifísiu foun rua ba eskola refere”.
Enkuantu orsamentu ba konstrusaun edifísiu foun ne’e sei iha prosesu diskusaun.
Iha parte hanesan, Koordenadora Eskola Bázika Filial Balibar, Alsina Exposto Sarmento, deklara edifísiu rua ne’ebé eskola ne’e iha hari husi ONG Plan no Lotaria iha tinan 2006.
“Edifísiu rua ne’e hari husi Plan Internasionál no Green Lotaria, maibé tanba kauza husi dezastre natural ne’ebé akontese iha loron 04 Fulan Abríl tinan 2020 implika tebes ba edifísiu rua ne’e grave. mezmu nune’e sira nafatin uza eskola refere hodi hala’o prosesu aprendizajen tanba seidauk iha edifísiu foun”. Nia haktuir.
Maski ne’e sai preokupasaun tebes ba prosesu aprendizajen estudante sira nian no risku mós ba estudante no profesór sira nia vida, maibé eskola nafatin hanorin tanba la iha tan edifísiu seluk so ida ne’e de’it.
“Kona ba pedidu eskola sempre hato’o ba parte ministériu relevante sira, mai depois hetan vizita husi PM Xanana Gusmão, ohin kompleta tan ho ekipa Sekretáriu Estadu ba Ensinu Sekundáriu no Eskola Téknika Vokasionál (SEESETV), Domingos Lemos Lope, it fiar katak eskola refere sei hetan tulun”.
Kona ba estudante iha eskola ne’e hamutuk 192 ho sala de aula neen (6) ho turnu 2, Segundu Ciclo aprende iha parte dadeer no Terceira Ciclo iha parte loraik, biblioteka la iha no bee moos ne’ebé durante ne’e sira uza iha eskola ne’e oferese husi komunidade sira.
603 total views, 9 views today
Bele hare Video Seluk :
Subscribe to Timorpost
