DILI, (timorpost.com)— Governu Repúblika Indonézia (RI), husu Komisaun Nasionál Eleisaun (CNE, sígla Portugés), atu akompaña sira-nia Eleisaun Prezidensiár 2024 ne’ebé sei hala’o iha loron bainrua, 14 fulan-Feveréiru.
“Sim, ita-nia komisáriu na’in-2 ho tékniku ida mak ba akompaña sira, tanba sira-nia konvite fó ba ema na’in-2 de’it ho tékniku ida mak akompaña, tanba sira haree mós ba ita-nia kooperasaun ne’ebé mak iha”, dehan Prezidente CNE, José Belo, iha salaun Lalini Larigutu Kolmera, Segunda-feira, (12/02).
Nia subliña, tanba haree ba kestaun kooperasaun di’ak tebes entre nasaun rua entaun Indonézia hakarak Timor-Leste nia prezensa iha sira-nia eleisaun ne’e importante loos ba sira.
“Durante ita-nia prosesu eleisaun iha ita-nia rai-laran ne’e sai mós hanesan referénsia di’ak mós ba Indonézia, tanba ne’e mak iha sira-nia eleisaun ne’e sira presiza mós ita ba akompaña”, deklara Nia.
Tuir nia, “Komisáriu na’in-2 ho tékniku ida agora iha Indonézia la’ós de’it ba haree eleisaun maibé ba vizita mós eleitór sira inklui ba haree fatin sira ne’ebé mak prepara atu vota ne’e halo nusa, entaun kuandu sira fila-fali mai ho esperénsia sira ne’ebé mak sira iha, bele lori ida-ne’e hodi kontribui ba rai ida-ne’e liuliu ba Komisaun Nasionál Eleisaun, ba prosesu eleisaun jerál sira ne’ebé mak sei mai, nune’e Timor-Leste nasaun ki’ikoan maibé sai nafatin ezemplu ba sira”.
Atu hakotu Prezidente CNE hatete, ekipa husi CNE Timor-Leste ne’ebé daudauk ne’e iha Indonézia sei akompaña prosesu eleisaun tomak hahú husi kampaña eleitorál to’o eleisaun remata tiha mak fila-fali mai Timor-Leste.(*)
2,910 total views, 3 views today
Bele hare Video Seluk :
Subscribe to Timorpost
