DILI (timorpost.com) – Eletrisidade de Timor-Leste Empreza Publika (EDTL.EP) realiza enkontru Grupu Traballu Inter-ministerial (GTI)-Power Distribution Modernization Project (PDMP).
Komisáriu Ezekutivu Servisu Tékniku EDTL.EP, Latino Jerónimo akompaña husi Jerente Projetu EDTL.EP, Andreas Tani, hala’o enkontru dahuluk ho ekipa husi Ministériu Justisa, Ministériu Agrikultura no Peskas, Ministériu Finansas, Ministériu Obras Publikas, ADB no PDMP iha sala reuniaun Kaikoli Dili.
Enkontru GTI-PDMP ne’e lidera husi komisáriu Ezekutivu Servisu Tékniku EDTL.EP, Latino Jerónimo, hato’o agradese ba membru GTI sira hotu.
Nia haktuir, objetivu husi sorumutu ne’e mak partilla ba liña ministériu/tékniku relevante sira atu solisita apoiu servisu PDMP nian, hodi halo faze preparasaun, konstrusaun no mós manutensaun ba projetu modernizasaun no konstrusaun edifísiu foun EDTL.EP iha munisípiu 12.
Tanba ne’e, presiza tebes apoiu husi GTI, tanba involve kestaun sósiu-ekonómiku no ambientál.
Iha oportunidade ne’e, Jerente Projetu EDTL.EP, Anderias Tani, atualiza kona-ba sosializasaun konstrusaun ba edifísiu foun iha munisípiu 12 ho autoridade munisípiu inklui administradór sira, Xefe Suku, Terras Propriedades no PNTL.
Iha tempu hanesan, Espesialista Reasentamentu ADB nian, Poppy Ribeiro, akresenta katak, dezde projetu ne’e Co-financia ho ADB, Governu Timor-Leste presiza kumpre Polítika ADB nian, hodi haree liu ba kestaun reasentamentu sosiál no ambientál tuir akordu emprestimu.
Iha tinan 2021, GoTL asina akordu emprestimu ho Banku Aziátiku ba Dezenvolvimentu (ADB) ho valor $35M no mós fundos kontra-partida ho valor $15M, hodi “hadi’a fornesimentu enerjia eletrisidade no melloramentu dezempeñu finansiál iha EDTL.EP” ho durasaun tinan 5 (2021-2026).
Enkuantu, fundus husi ADB foku ba modernizasaun no dijitalizasaun sistema distribuisaun, fundos kontra-partida nian sei foku mós ba reabilitasaun rede no konstrusaun edifísiu.
Enkontru ne’e partisipa husi Ministériu Justisa, Ministériu Agrikultura no Peskas, Ministériu Finansas, Ministériu Obras Publikas, ADB, EDTL.EP no mós PMU/PDMP.
1,287 total views, 6 views today
