DILI—Perspetiva autoridade lokál kona-ba sidadaun hotu-hotu, iha direitu atu partisipa másimu iha festa demokrasia, maibé labele sai instrumentu provokasaun ba deklarasaun polítiku kro’at nian.
“Eleisaun Parlamentár besik ona, ha’u hanoin povu preparadu atu vota, sira iha direitu atu vota se-se depende sira, ha’u hanesan autoridade suku husu de’it povu sira, atu labele sai instrumentu provokasaun ba ita nia lider polítiku sira nian”, Xefe Suku Madohi, Bernardino de Cristo Ferreira, “Teki Timur” ba Timor Post iha nia knaar fatin Sede Suku Madohi, Sábadu (18/03).
Teki Timur konta esperiénsia lubuk ida iha Eleisaun Prezidensiál tinan kotuk, hatudu povu mak sei determina ukun na’in sira nia ambisaun polítika, atu hakat ba ukun iha períodu ne’e. Maibé dala-ruma polítiku sira tun ba kampaña la’ós fa’an de’it programa partidu nian, atu hetan povu nia konfiansa, dala barak insulta malu, hatún malu, to’o provoka problema iha prosesu kampaña la’o.
“Husu ba komunidade tomak iha Suku Madohi tenke maduru, atu labele hamosu problema, polítiku sira ne’e ita povu mak hili sira mak foin ba ukun, tanba ne’e lalika monu ba sira nia provokasaun”, nia husu.
Iha kampaña lubuk ida tinan hirak ba kotuk, iha munisípiu balu hamosu insidente ne’ebé rezulta ema kanek no mate, tanba erru umanu ne’ebé sidadaun ida-idak seidauk maduru ezerse nia direitu atu partisipa kampaña.
“Iha tinan hirak ba kotuk kampaña sempre mosu insidente hodi rezulta ema balu kanek no balu lakon sira nia vida, tanba ita ladún maduru ezerse ita nia partisipasaun ba iha kampaña”, nia konta.
País ida ne’e, labele iha tan konfrontasaun, labele iha tan ema kanek, labele iha tan ema mate durante hala’o kampaña, tanba esperiénsia lubuk ida, di’ak ou at ita liu ona, sai ona lisaun ida povu atu evita sai instrumentu polítiku nian.
Enkuantu, iha fatin ketak, Xefe Aldeia Klaak-Fuik, Almerindo Fatima Teodozo, perspetiva ba Eleisaun Parlamentár tin ne’e, atu la’o pás labele fó kulpa de’it ba Polisia Nasionál Timor-Leste (PNTL) mak tenke halo seguransa másimu.
Maibé, presiza sidadaun hotu-hotu ninia kontribuisaun, atu garantia estabilidade iha prosesu kampaña to’o tama eleisaun no desizaun ikus husi Tribunal Rekursu ba determinasaun partidu votante barak.
“Ha’u hanesan autoridade, ha’u nia hanoin eleisaun ida ne’e atu la’o seguru, labele tula responsabilidade tomak ba ita nia PNTL de’it, maibé sidadaun ida-idak nia responsabilidade atu garantia estabilidade mak determinante liu”, nia hateten.
Durante kampaña membru PNTL esforsu maka’as ho limitasaun rekursu umanu no ekipamentu konsege kontrola kampaña sira ne’ebé la’o tinan hirak ba kotuk ho di’ak. Mais mosu nafatin insidente iha fatin balu, tanba sidadaun ida-idak nia responsabilidade atu kontribui ba estabilidade seguransa ba tempu kampaña mak sei mihis, entaun hamosu provokasaun, ikus mai rezulta insidente.
“Ha’u rekomenda ba sidadaun hotu-hotu tenke kontribui ba estabilidade seguransa durante kampaña to’o eleisaun remata no anunsia rezultadu”, nia rekomenda.
Ko’alia kona-ba asuntu seguransa labele depende de’it ba iha PNTL ho F-FDTL, tanba rekursu la to’o atu garante estabilidade iha rai laran, importante tebes sidadaun Timoroan hotu nia kontribuisaun hodi asegura ba festa demokrasia tinan ne’e.
1,380 total views, 3 views today
Bele hare Video Seluk :
Subscribe to Timorpost
