DILI (timorpost.com) — Polisia Nasionál Timor-Leste (PNTL) liuhusi seksaun Polisia Tránzitu Munisípiu Dili, durante semana tolu hahú iha loron 01 to’o iha 21 fulan Janeiru tinan ne’e, hamata reseita ba iha kofre estadu hamutuk 25,757 USD.
Komandante Tránzitu Munisípiu Dili, Inspetór Polisia, Domingos Sarmento Gama, hatete durante semana tolu Polisia Tránzitu Munisípiu Dili, kontribui reseita hamutuk 25,757 USD ba kofre estadu.
Nia dehan, reseita ne’e mai husi transporte sira prende hamutuk 377, transporte sira hanesan motor ho karreta sira ne’ebé kontra infrasaun, tanba ne’e sira prende no selu multa tuir infrasaun ne’ebé sira viola.
“Durante semana tolu, iha fulan Janeiru nia laran hahú husi dia 01 to’o 20 Janeiru tinan ne’e, ita hatama reseita hamutuk 25,757 USD ba kofre estadu, reseita sira ne’e, mai husi evidénsia sira ne’ebé ita prende,” dehan Gama ba jornalista sira iha nia knaar fatin Komandu PNTL Munisípiu Dili, Segunda (23/01).
Komandante Sarmento hatutan, infratór sira ne’ebé komete infrasaun hahú loron 01 to’o 20, sira seidauk selu koimas ka seidauk selu nia deveres mak hamutuk 43001 USD.
Tanba ne’e, nia hanesan komandante Tránzitu Munisipiu Dili, hakarak apela ba infratór sira ne’ebé seidauk mai selu koimas ba sira-nia transporte ne’ebé komete infrasaun, atu hakbesik an ba selu.
“Ita apela ba sira mak seidauk selu, tuir lei 90 dias nia laran ne’e sira tenke selu, maibé iha 90 dias laran mak la selu, liu ona loron 91, sira-nia transporte karreta ho motor ne’ebé ita prende ne’e, afavor ona ba Estadu,” nia esplika.
Tanba ne’e, sidadaun ne’ebé sente sira-nia transporte komete infrasaun atu mai selu multa, hodi foti fali sira-nia transporte sira, tanba liu ona loron 90 ba leten laiha ona direitu atu selu koimas, maibé evidénsia sira hanesan karreta ho motor sira afavor ona ba Estadu.
“Evidénsia sira hanesan transporte karreta ho motor ne’ebé komete infrasaun sira durante ne’e, ita-nia sidadaun barak liu mak kontra sinais no halo estasionamentu kontra parajen, ita-nia sinais koloka ona mais, ita-nia sidadaun sira seidauk iha konxiensia, hodi respeita Lei kódigu estrada,” nia hakotu.
1,444 total views, 3 views today
Bele hare Video Seluk :
Subscribe to Timorpost
