DILI (Timor Post)–Joven sira hurlele malu Iha Postu Administrativu Uatulari, Munisípiu Vikeke, Polisia Nasionál Timor-Leste liuhusi Unidade Espesial Polisia (UEP), kaptura ema na’in-neen.
“Problema ne’e mosu tanba vítima ho suspeitu sira hamutuk iha mate uma hodi halo servisu no sira hemu tua to’o lanu todan hodi deskute malu to’o baku malu, rezulta vitíma nain-2 hetan kanek iha ulun,” dehan Komandante UEP, Superintendente Xefi Orlando Gomes, iha Bairu-Pite, Kuarta (13/07).
Nia esplika, momentu ne’e kedas membru sira hamutuk ho esquadra Uatulari halo kedas kapturasaun ba suspeitu na’in-6 ho inisiál AC, AA, AC, LA, PM, no MB.
“Iha prosesu kapturasaun ba suspeitu nain-6 ne’e, UEP-COE lidera husi Komandante Pelotaun Inspetór Asistente Polisia, Mateus Pinto, hamutuk ho ekipa task force Vikeke nian ne’ebé destaka iha Uatular,” tenik nia.
Agora suspeitu na’in-6 ne’e detein ona iha eskuadra PNTL Uatulari hafoin kontinua halo prosesu identifikasaun hodi submete ba investigasaun”, nia afirma.
Atu hakotu nia dehan tan, membru UEP-COE ne’ebé destaka iha Munisípiu Vikeke reforsa Komandu PNTL hodi kontrola rigorozu ba joven sira ne’ebé perturba ordem públika.
1,752 total views, 3 views today
