DILI (timorpost.com) – Polísia Nasionál Timor-Leste (PNTL), Munisípiu Dili liuhusi Unidade Tránzitu Rodaviaria, halo pasa revista iha Loron Kinta kalan (08/09), prende motorizada hamutuk unidade 35.
Tuir observasaun Timor Post online iha terenu, motorizada sira ne’ebé Polísia Tránzitu Munisípiu Dili prende ne’e, maioria xapa matrikula laiha, dokomentus laiha, nune’e mós karta kondusaun laiha, inklui asesores la kompletu no uza kanu resin.
Motorizada sira ne’e prende, hafoin Polísia Tránzitu Munisípiu Dili, halo pasa revista iha Portu Dili nia oin, hahú husi tuku 08:00 to’o tuku 11:00 oras Timor-Leste nian.
Hafoin prende motorizada hirak ne’e, ekipa lori kedas evidénsia hirak ne’e ba iha Komandu PNTL Munisípiu Dili, Kaikoli hodi fó resibu ba motorizada nia na’in sira hodi ba selu koima iha Banku molok foti hikas sira-nia motor hirak ne’e.
Durante oras pasa revista, PNTL hatudu sira-nia komportamentu ne’ebé di’ak tebes ba sidadaun sira hotu ne’ebé tama iha pasa revista refere.
Maibé, sidadaun baluk la koopera hodi lori motor atu soke de’it membru PNTL sira ne’ebé halo pasa revista, tanba la uza kapasete tauk kondus motor ho velosidade makas, entaun ekipa PNTL husik nia liu de’it la konsege prende.
Fó hanoin mós katak, pasa revista ne’e hetan apoiu mós husi, Tasforce, Servisu Operasaun Polísia, Servisu Intelijénsia no sira seluk tan, no ba oin sei kontinua nafatin.
2,032 total views, 6 views today
