(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post) – Ministériu Solidariedade Sosiál no Inkluzaun (MSSI) liu husi Diresaun Nasionál Asisténsia Sosiál (DNAS) kria programa Bolsa da Mae hodi fó subsídiu 15 USD kada fulan ba inan isin rua, hodi bele sosa hahán nutritivu durante períodu gravidade fulan sia nia laran.
Diretór Diresaun Nasionál Asisténsia Sosiál (DNAS), Lucas Tois, hatete, programa ne’e fó subsídiu ba inan isin rua, inklui inan sira ne’ebé seidauk kaben ou sira ne’ebé mak sei eskola hetan ona oan, sira iha direitu asesu ba Bolsa da Mae ne’e.
Lee Notisia Relevante : Labarik Sira Hosi Tinan 0 To’o 6 Sei Hetan Subsídiu Kada Fulan Hosi Governu
“Alvu husi programa ne’e mak ita atu foka ba inan ne’ebé isin rua katak, maibé la’ós obrigatóriu, karik inan isin rua balu lakohi aplika ba programa ne’e la obriga,” nia dehan ba Jornalista sira, iha Otél Timor, Tersa (29/03).
Nia subliña tan, inan isin rua sei hetan subsídiu durante fulan sia, ho objetivu atu enkoraja sira nia aan, atu bele vizita ba iha sentru saúde, no mós fasilidade saúde sira atu hetan akompañamentu no akonsellamentu regulár durante períodu gravidés.
“Subsídiu ida ne’e mós, atu insentiva rendimentu ne’ebé agora inan isin rua sira iha, atu sira bele sosa hahán nutritivu ba konsumu durante períodu gravidés,” nia hateten.
Programa ne’e, sei implementa iha fulan Abríl ou Jullu tinan ne’e, sei hahú hsu munisípiu tolu hanesan Ainaru, Bobonaru no Oekusi, no sei kontinua rejistu ba benefisiáriu ba munisípiu seluk sira seluk tuir mai. Nia hakotu. (Lee Notísia Seluk iha Jornál Timor Post/Asesu You Tube Timor Post)
1,160 total views, 3 views today
Bele hare Video Seluk :
Subscribe to Timorpost
