DILI (timorpost.com) – Fundasaun Mahein (FM), husu Polisia Sientífiku Investigasaun Kriminál (PSIK) atu buka tuir autór ne’ebé públika suspeitu eis Ministru Interior, Longuinhos Monteiro, nia video iha media sosiál (MedSos), baihira parte PSIK halo hela investigasaun ba nia kona ba armas branka ne’ebé mak nia rai subar iha nia rezidénsia.
Diretór Interinu Fundasaun Mahein (FM), Abel Amaral, hatete relasiona ho publikasaun video eis Ministru Interior, Longuinhos Monteiro nian ne’ebé viral iha media sosiál, baihira Polisia Sertifika Investigasaun kriminál (PSIK), halo hela investigasaun, tuir loloos la bele tanba ida ne’e segredu Justisa.
“Ami husu Polisia Sientífiku Investigasaun Kriminál (PSIK), atu buka tuir autór ka pesoál ne’ebé halo publikasaun eis Ministru Interior Longunhos Monteiro nia video iha media sosiál, atu nune’e bele responsabilidade ba nia aktu ida ne’e, tanba ida ne’e segredu Justisa, la bele públika iha media sosiál,” dehan Abel iha nia knar fatin Bairru Grillus, Kinta (19/01).
Nia dehan, dala-ruma la’ós parte autoridade seguransa no organizasaun kriminál sira mak halo publikasaun, tanba sira halo sira-nia servisu ba suspeitu ne’ebé halo krime, maibé sira ne’ebé halo gravasaun ne’e iha pesoál balun mak halo depois halo publikasaun iha media Sosiál.
“Tanba ne’e, ita husu ba PSIK atu atensaun ba ida ne’e, tanba servisu hotu-hotu ne’e la’ós públika iha media sosiál hotu, tanba ne’e atensaun ba ida ne’e atu nune’e baihira halo investigasaun haree ba pesoál sira iha laran,” nia haforsa liu tan.
Nia hatete, karik kazu ne’ebé dehan segredu Justisa, kuandu públika iha media sosiál, ninian impaktu ne’e ba iha segredu Justisa no impaktu ba servisu Judisiáriu nian, tanba ne’e autór ka pesoál sira ne’ebé públika iha media sosiál, tenke buka tuir, atu nune’e la bele fó impaktu ba iha judisiáriu.
2,470 total views, 3 views today
Bele hare Video Seluk :
Subscribe to Timorpost
