DILI, (timorpost.com)— Diretór ezekutivu Asosiasaun HAK, Feliciano da Costa Araújo, husu autoridade seguransa tenke buka tuir no fó sansaun forte ba autór ne’ebé prodús osan falsu ne’ebé daudauk ne’e sirkula ona iha rai-laran.
“Osan falsu ne’e la’os foin sirkula ho montante $50 sentavu ne’e, maibé uluk $100 dolar ne’e la’o manas los iha ita rai, tanba ne’e ita tenke kuidadu no presiza atu bele kontrola fila-fali para atu rekolla ida-ne’e hotu no publika ba iha sosiedade tomak katak totál osan sai ne’e mak ne’e, nune’e mós tenke buka tuir autór ida ne’ebé kria buat sira ne’e, tanba ida-ne’e viola ona regra ida ne’ebé mak ita no estadu ida ne’e kria, maibé ema balun hakarak viola ida-ne’e, ha’u hanoin ida-ne’e tenke fó sansaun forte”, Diretór ezekutivu Asosiasaun HAK, Feliciano da Costa Araújo, informa ba jornalista sira iha nia kna’ar fatin Faról, Segunda, (04/03).
Nia esplika katak autoridade siguransa liuliu Polísia Sientífiku Investigasaun Kriminál (PSIK) ne’ebé iha mandatu tolu importante mak, fase osan ka Brankeamentu kapitál, tranzasaun ilegál ne’ebé ho númeru boot hanesan droga, no ikus liu mak tráfiku umanu. Tanba ne’e presiza halo idetifikasaun no kaptura autór sira ne’ebé prodús osan sira ne’e ho ilegalmente.
Osan falsu ne’e karik prodús iha rai-liur, ne’e la’os fásil atu identifika maibé karik prodús iha rai-laran mak presiza hatene prodús iha ne’ebé no mákina prodús osan ne’e see mak hatama.
“Ita nein atu ba haree tuir produtu sira halo iha ita-nia rai-laran ne’e, presiza haree, mákina sira ne’e utiliza ba saida, mákina ida utiliza mak viola regra iha ita-nia rai Timor ne’e, ha’u hanoin presiza fó sansaun forte, see lae ida-ne’e foin osan, ba oin bele prodús hahan iha laran, maibé laiha kualidade, ne’e impaktu boo ba ita-nia populasaun, agora ita haree ba osan, maibé ba oin bele akontese tan ba ha-han, ida-ne’e bele fó risku boot ba ita-nia estadu ida-ne’e”, dehan nia.
Nia akresenta, ajente estadu nian no sosiedade rasik atu bele tulun para oinsá deskobre mákina prodús osan falsu ne’e atu nune’e labele espalla ba iha fatin-fatin.
Aleinde ne’e, nia mós husu ba Banku Sentrál Timor-Leste (BCTL, sígla Portugés) atu bele kontrola para rekolla hotu osan falsu sira ne’e.(*)
1,161 total views, 3 views today
Bele hare Video Seluk :
Subscribe to Timorpost
