DILI (timorpost.com) — Tenente Jenerál Reformadu, Lere Anan Timur (LAT), hakarak hatene situasaun iha mundu no Timor-Leste, Kinta (06/10), hala’o vizita ba Prezidente Repúblika (PR), José Ramos Horta iha Palásiu Prezidensiál, Bairru-Pité.
Nia hatete, ohin mai hasoru Prezidente Repúblika, hanesan mai vizita hodi informa situasaun no hakarak mós rona situasaun mundu nian, ne’ebé nu’udar Prezidente ou aman ba nasaun ne’ebé la’o nia hatene.
“Tanba ida ne’e mak ha’u mai vizita nia, ha’u fó informasaun uitoan kona-ba rai laran no mós hakarak hatene situasaun iha mundu no Timor,” LAT hateten hafoin enkontru ho PR Horta.
Nia subliña, situasaun hanesan iha mundu, nasaun sira ne’ebé ajuda Timor ba dezenvolvimentu iha rai laran, situasaun tenke hakmatek, kona-ba situasaun atu hakmatek mak hotu-hotu bele dezenvolve rai ne’e, se la hakmatek dezenvolvimentu nunka la’o ba oin.
Alende ne’e mós Tenente Jenerál Reformadu, LAT informa ba Xefe Estadu katak, agora atu halo tinan ida ne’e hodi sai polítiku.
“Ha’u dehan ne’e dazafiu boot ba ha’u, mais ha’u konfia ha’u-nia an mak ha’u moris to’o agora ne’e, ha’u sei la konfia ema seluk, se ha’u konfia ema seluk ohin loron ha’u laiha,” nia afirma.
“Mais ha’u sempre hasoru Prezidente, Líder sira hotu-hotu hanesan maun Xanana, Taur, sira-nia apoiu ba ha’u-nia kareira polítika ne’ebé ha’u hala’o, ne’e la’ós kareira foun, ne’ebé ha’u 24 anos mak polítiku militár, mais agora ha’u polítika loos de’it ona, militár laiha,” nia hateten.
2,567 total views, 3 views today
Bele hare Video Seluk :
Subscribe to Timorpost
