DILI—kazu kobransa ilegál neebé deskonfia envolve husi pesoál saúde Hospital Nasionál Guido Valadares (HNGV) ho inisiál ZO, Komisaun Anti Korrupsaun (CAC sigla portugés), remete ona rezultadu investigasaun ba Ministériu Públiku (MP).
Diretór Investigasaun Komisaun Anti Korrupsaun, José Veridial, hatete iha loron Tersa (07/03), CAC halo ona investigasaun ba funsionáriu HNGV nee, bazeia ba informasaun sira neebé mak espalla iha públiku.
“Foin lalais nee ami halo deit investigasaun ba iha identifikasaun, no rezultadu identifikasaun nee ami haruka ona auto partisipasaun ba iha Ministériu Públiku”, nia informa ba Timor Post liuhusi telefone, Kinta (09/03).
Nia dehan, KAK submete ona prosesu identifikasaun, tanba nee hein deit prosesu kontinuasaun husi nain ba asaun penal Ministériu Públiku.
“Ita hein deit, depois Ministériu Públiku rejista hanesan autór inkéritu, depende ba iha Ministériu Públiku, maibé kuandu Ministériu Públiku delega mai KAK, entaun ita kontinua prosesu investigasaun”. Nia hakotu.
CAC hanesan órgaun polísia kriminál espesializada tuir lei númeru 8/200, kona-ba lei CAC nian, iha artigu 5 fó kompeténsia ba CAC, atu bele halo identifikasaun no detensaun ba sidadaun neebé prátiku aktu subornu.
2,022 total views, 3 views today
Bele hare Video Seluk :
Subscribe to Timorpost
