DILI (TIMORPOST.COM—Maski eleisaun segunda volta konklui ona no rezultadu eleisaun hatudu Xefe Suku, Xefe Aldeia, delegadu no delegada sira eleitu hotu ona, maibé konsellu suku sei hili lia-na’in no reprezentante juventude feto no mane, iha loron 24 fulan Novembru tinan ne’e.
Diretór Jerál, Sekretariadu Tekniku Administrasaun Eleitorál (STAE), Acilino Manuel Branco, deklara, xefe suku sira ne’ebé eleitu ona iha eleisaun primeira volta no segunda volta, bele kria ona enkontru, atu hili lia-na’in no reprezentante juventude feto no mate, mais labele liu hosi loron 24 Novembru.
“Konsellu suku tarde enkontru signifika la prienxe nia prosedimentu ne’ebé iha, tanba atu ba enkontru iha 24 Novembru, membru konsellu suku sira ne’ebé eleitu ona iha eleisaun sira maka hili lia-na’in no reprezentante feto ho mane,” Acilino informa ba jornalista sira iha STAE Kaikoli, Tersa (14/11/2023).
Durante eleisaun primeira volta no segunda volta, STAE la rejista kazu grave ruma, mais ida ne’e orasida bele konfirma ho parte seguransa, maibé to’o horisehik lokraik parte STAE nen simu kazu sériu ruma. STAE seidauk simu preokupasaun ruma husi sidadaun sira, hanesan saida maka sidadaun sira hasoru iha eleisaun primeira volta no segunda volta.
Iha Segunda (13/11/2023) lokraik maka simu informasaun husi STAE munisípiu Covalima, katak iha sidadaun balu maka hamosu dezentendimentu ba malu, mais la perturva iha prosesu eleisaun ne’e rasik.
Husi akontesimentu sira ne’e, parte seguransa foti ona medida ruma no prosesu la’o hela iha ne’ebá, maibé jeralmente husi suku 271 laiha problema no prosesu hotu-hotu la’o ho di’ak no lalais.
“Ita seidauk iha informasaun detalla katak, feto hira maka eleitu ba xefe suku, mais kuaze iha munisípiu balu iha”, nia hateten.
Iha Rejiaun Administrativu Espesiál Oekusi Ambenu (RAEOA), xefe eleitu sira mane hotu kedas, Likisá mós hanesan xefe suku eleitu sira mane hotu, iha Dili parese informasaun ne’ebé iha media sosiál katak, feto ida maka lidera iha suku Bairru-Pité, maibé ofisialmente seidauk iha informasaun klaru, nune’e mós Manufahi feto ida lidera.
Signifika katak iha feto eleitu ba eleisaun segunda volta nian, maibé dadus munisípiu sira seidauk tama hotu, tanba horisehik foin eleisaun no halo kedas apuramentu iha munisípiu. Entaun informasaun sira ne’e, orasida uitoan foin hatene rezultadu loloos husi suku sira 271 feto se-se maka eleitu tan.
Taxa partisipasaun eleitor iha eleisaun ne’e seidauk bele fó sai detalla, maibé haree husi kandidatu iha eleisaun 2016 no 2023, iha tinan 2016 eleitor rihun 700 mais agora rihun 900 resin.
Entaun eleitor ne’e aumenta, partisipasaun eleitor mós aumenta, tanba iha munisípiu balu partisipasaun eleitór barak. Iha eleisaun primeira volta no segunda volta nian, eleitor hotu-hotu ona nia komportamentu no devér sívika ida ne’ebé maka voluntariumente espresa ema ida-idak nia partisipasaun iha sentru votasaun sira.
Tanba Timor-Leste hanesan nasaun demokrátika, ema hotu-hotu iha konxiénsia ba hodi fó eskola ba xefe suku, aldeia, delegadu delegada hanesa ema hotu-hotu hatene katak rezultadu iha ona.
Antes iha preokupasaun no lamentasaun balu, mezmu nune’e ema hotu komprende katak nia prosesu no lala’ok maka hanesan ne’e, prosesu eleisaun sempre la’o bazeia ba lei no regulamentu sira.
Tan ne’e iha eleisaun liuba halo populasaun hotu preokupa, maibé ne’e natureza eleisaun suku maka la’o hanesan nune’e, na’in ba prosesu maka komunidade sira rasik. Husi ne’e komprova katak rezultadu to’o iha rohan hodi simu rezultadu, sein-rejista perturvasaun ba iha prosesu eleisaun ida ne’e nian.
Rezultadu hatudu katak órgaun konsellu suku sira eleitu hotu ona, falta de’it atu hili lia-na’in ho juventude feto mane, signifika katak órgaun konsellu suku sira no povu tomak hodi fó lejitimitadade ba atu nune’e ida-idak bele hala’o nia funsaun iha ida-idak nia suku no aldeia.
Kongratula ba povu Timor laran tomak, parabéns ba xefe suku eleitu sira, xefe aldeia delegadu no delegada sira ne’ebé eleitu ona, servisu ho di’ak hodi bele lori dezenvolvimentu ba suku.
4,594 total views, 6 views today
Bele hare Video Seluk :
Subscribe to Timorpost
