DILI (timorpost.com)—Prezidente Repúblika (PR) Jose Ramos Horta fó pose ba Vise Ministra Finansas (V-MF), Felícia Claudinha de Carvalho iha Palasiu Prezidensiál Aitarak-laran, Sesta (15/09) molok dezloka ba Nova Yorke.
Husi tomada de pose ne’e Vise Ministra Finansas atuál promete sei asegura servisu iha Instituisaun Ministériu Finansas ho di’ak ba nasaun ida ne’e.
Agradese ba Primeiru Ministru (PM), Kay Rala Xanana Gusmão no Prezidente Repúblika (PR), José Ramos Horta, ne’ebé fó konfiansa hodi asume kargu Vise-Ministra Finansas.
“Ba konfiansa ne’ebé fó mai ha’u, knaar no oportunidade ida ne’e onra tebes hanesan vise Ministra Finansas,” V-MF, haktuir ba Jornalista hafoin remata serimónia simu Toma de Posse.
Vise Ministra Finansas ne’e hatete, knaar ne’e assume prontu servisu no asegura durante mandatu IX Governu liuliu iha Ministériu Finansas (MF), sei koopera hamutu ho ekipa tomak ba servisu hotu-hotu liuliu ba povu Timor Leste.
Tanba ne’e, Felícia hatete, tama servisu lai, espera katak sei hasoru malu iha loron seluk hodi ko’alia kona-ba asuntu relevante Ministériu Finansas nian.
Felícia Claudinha Cruz Carvalho, sei substitui Vise-Ministru Finansas sesante Helder Lopes iha mandatu IX Governu Konstitusionál.
Iha tinan 2007-2012, Felícia Claudinha Cruz Carvalho hala’o knaar nu’udár asesora iha Gabinete Ministra Finansas Emilia Pires no tinan 2017, Felícia Carvalho servisu nu’udár Xefe Unidade Jestaun Parseiru Dezenvolvimentu iha Ministériu Planu Finansas.
Iha Segunda, 11 fulan-Setembru 2023, liuhosi proposta nomeasaun hosi Primeiru-Ministru (PM), Xanana Gusmão, husu ba Prezidente Repúblika, José Ramos-Horta, atu fó posse ba Vise-Ministra Finasas, Felícia Claudinha Cruz Carvalho.
Proposta ne’e ho númeru 095/PM-GPM/IX/2023, asina diretamente hosi Primeiru-Ministru Xanana Gusmão.
1,497 total views, 3 views today
