DILI (timorpost.com) – Eskola sekundária Tékniku Vokasionál ospitalidade Turizmu (ETVOT) Bekora menus profesór ba matéria modelajen no matéria espesífiku.
Xefe departamentu eskola ETVOT, Clementina Almeida, hatete, iha eskola ETVOT ne’e enfrenta difikuldade mak hanesan menus profesór ba matéria espesífiku nian, entaun difikulta tebes ba prosesu aprendizajen iha sala laran.
“Durante ne’e ami hasoru difikuldade mak menus profesór matéria espesífiku kostura modelajen hodi hanorin estudante sira iha sala laran entaun dala ruma ami fahe oras hodi prenxe hotu matéria ne’ebé profesór laiha hodi kompleta”, xefe departamentu eskola ETVOT, Clementina Almeida, hateten ba Timor Post iha eskola tékniku vokasionál Bekora, Sábadu (27/05).
Tuir nia, profesór labele menus atu nune’e labele abandona estudante sira iha sala laran hodi nune’e enkoraja nafatin estudante sira atu partisipa matéria iha sala laran ho másimu.
Aleinde ne’e, iha problema seluk mak menus fasilidade hanesan kadeira, meza no biblioteka, entaun problema hirak ne’e mós bele impede prosesu aprendizajen iha sala laran.
Portantu, matéria jerál ne’e profesór kompletu, maibé matéria espesífiku modelajen profesór na’in-haat de’it, entaun la sufisiente hodi hanorin estudante sira husi primeiru ano to’o terseiru ano.
“Iha departamentu balun dixiplina ka matéria hitu profesór laiha, entaun susar tebes, tanba ne’e mak ami husu ba Ministériu Edukasaun Juventude no Desportu (MEJD) atu rekruta tan profesór eskola tékniku vokasionál hodi bele prenxe ba matéria ne’ebé profesora sira seidauk iha ne’e hodi kompleta atu hanorin estudante sira”, manorin na’in ne’e ezije.
Nia dehan, eskola tékniku ne’e presiza fasilidade kompletu liuliu kadeira, meza, no biblioteka hodi fasilita estudante sira atu uza hodi partisipa iha prosesu aprendizajen ho di’ak.
Enkuantu, eskola refere ho nia sala de aula hamutuk 12, maibé sala rua aat tiha no daudaun ne’e sala 10 de’it mak estudante sira uza hodi partisipa iha prosesu aprendizajen.
Portantu, eskola ne’e iha profesór hamutuk na’in-32 kompostu hosi permanente no kontratadu no eskola refere ho nia estudante primeiru ano hamutuk na’in-150, enkuantu estudante segundu ano hamutuk 180 no estudante terseiru ano hamutuk 100, entaun total primeiru ano to’o terseiru ano hamutuk 430.
1,719 total views, 6 views today
