BAUKAU (timorpost.com) – Servisu Munisipál Edukasaun Juventude no Desportu (SMEJD,) halo enkontru ho dirijente eskola sira, hodi ko’alia kona-ba preparasaun realiza ezame períodu dahuluk nian.
Diretór SMEJD Baukau Augusto Ximenes, hatete sira ko’alia ho dirijente sira hosi eskola ensinu báziku, ensinu sekundáriu jerál no tékniku vokasionál sira.
“Tuir ita-nia kalendáriu, atu hala’o ezame primeiru períodu iha loron 10 to’o 15 fulan oin”, nia hateten ba Timor Post, iha salaun Edukasaun Munisípiu Baukau, Sesta (17/03).
Nia dehan, ne’e enkontru rotina ne’ebé ke diresaun servisu munisipál edukasaun, sempre halo bainhira pasa ba ezame.
“Partisipa iha enkontru ne’e, ita-nia dirijente hosi eskola ensinu báziku sentrál hamutuk 28, ensinu sekundáriu iha eskola 14, no ensinu tékniku vokasionál iha 5,” nia informa.
Nia afirma, asuntu importante ne’ebé hato’o husi dirijente eskola sira mak ko’alia kona-ba falta profesór, liuliu profesór idozus no profesór moras permanente sira.
“Kona-ba ida ne’e ha’u hato’o, maibé ita hein tanba atu troka profesór la’ós ha’u-nia kompeténsia, tanba orsamentu selu profesór ministériu mak prevee, entaun sira mak iha kompeténsia,
Maibé, nia dehan hanesan dirijente iha munisípiu sira kontinua aprezenta preokupasaun ne’e ba leten.
Tuir observasaun durante enkontru ne’e, alende kestiona kona-ba profesór idozus no moras permanente, sira mós kestiona kona-ba konsensões eskolár, profesór voluntáriu no laiha guarda eskola.
957 total views, 91 views today
