Dili(timorpost.com)–Dili Institute of Technology (DIT) hala’o jogu DITSA Futsal Cup hodi hametin amizade entre estudante sira no hala’o mós preparasaun ba Dia Natalis DIT ninian ne’ebé sei selebra iha loron 10 fulan Maiu tinan ne’e.
Xefe Komisaun Organizadora, estudante Gabriel J. E. Afonso, hatete objetivu hosi atividade ne’e atu hametin liu tan amizade entre estudante sira no dosente sira.
“Ami hala’o jogu DITSA Futsal Cup hodi hametin amizade entre estudante sira no hala’o mós preparasaun ba Dia Natalis DIT ninian ne’ebé sei selebra iha loron 10 fulan Maiu tinan ne’e, ne’ebe atividade sira sira ne’e mak ami hala’o”, Gabriel J. E. Afonso, hatete ba jornalista sira iha Eskola DIT, Segunda (24/04/2023).
Iha atividade ne’e, partisipante hosi estudante DIT ne’ebé fahe ba grupu sanulu-resin-ida, mak fakuldade haat, iha departamentu sanulu ho Staff VIP nian ida. Iha jogu Futsal Cup ne’e, jogadór sira iha ekipa rua, mak mane no feto, ho nune’e ekipa rua ne’e hamutuk grupu ruanulu-resin-rua.
Fakuldade haat ne’e mak hanesan, Fakuldade Turizmu iha departamentu rua mak Hotel Management no Tour Travel Management, Fakuldade Estudu petrolíferu nian iha departamentu Petróleu management no petróleu enjeñaria, Fakuldade Siénsia Enjeñaria nian iha departamentu Enjeñaria Sivíl, Enjeñaria Mekánika no Siénsia Komputadór, Fakuldade Business nian iha departamentu Kontabilidade, Finansas no Jestaun Jerál.
Métodu ba jogu ne’e mak liga ho nune’e kada grupu ida-idak sei joga hasoru malu to’o ikus nian mak haree ba grupu ida ne’ebé ho ninia Pontus barak liu nia mak sei sai kampiaun.
Jogu ba modalidade Futsal ne’e hahú tiha ona iha loron 20 fulan Abríl no sei remata iha loron 9 fulan Maiu, molok atu tama ba Dias Natalis iha loron 10 fulan Maiu.
Alende ne’e, iha mós atividade seluk ne’ebé halo preparasaun ba Dias Natalis iha eskola DIT, atividade sira seluk ne’e mak hanesan kompetisaun ba Debate, Model no kompetisaun mós ba Banda múzika. Iha atividade sira ne’e sei realize iha loron rua ka tolu iha fulan Maiu mai ne’e.
Iha fatin hanesan, Dosente Enjeñaria Mekánika, João Bosco Belo, hato’o mós ninia mensajen ba estudante sira hotu, atu partisipa ativu nafatin iha atividade sira hotu.
Estudante hotu tenke partisipa iha atividade extra kurrikulár, oinsá mak imi bele kapasita imi-nia koñesimentu liu-liu iha imi-nia talentu desportu ninian.
“Alende ne’e ita mós labele aprende iha siénsia de’it, maibé aprende mós iha atividade extra kurrikulár atu ita bele hasa’e ita-nia kapasidade”, nia hakotu.
1,194 total views, 3 views today
Bele hare Video Seluk :
Subscribe to Timorpost
