Dili (timorpost.com)—Jogu kontinuasaun Liga Timorense segundu divizaun entre ekipa Nagardjo Fc kontra Fitun Estudante Lorosa’e (FIEL) Fc adia fali ba loron tuir mai, tanba impaktu hosi asidente ne’ebé mak arbitrajen halo iha kampu laran.
Tuir observasaun ne’ebé mak Timor Post haree, situasaun ne’e akontese hafoin Prezidente klube Nagardjo Fc, Artur da Luz Costa, la satisfás ho arbitrajen ne’ebé mak lidera jogu foti desizaun sala, tanba bola falta iha li’ur, árbitru hatudu fali iha grander laran hodi fó penalidade ba ekipa Fitun Estudante Lorosa’e Fc.
Nune’e nia parte la simu no halo kritika maka’as inklui riba kadeira no tuda kadeira iha fatin VIP tribune estádiu munisipál ninian tun ba iha kraik, nune’e hakarak tun ba hodi hasoru arbitrajen ne’ebé lidera jogu ne’e, maibé seguransa no parte órgaun LFTL Fc kontinua hakalma nia iha tribune leten.
Ho ida ne’e jogu komesa paradu maski ekipa rua halo jogu remata ona primeiru parte no tama fali ona ba iha segundu parte ekipa rua hatama ona golu rua ba malu ho rezultadu provizóriu 2-2.
Maibé komisaun Liga bolu reprezentante klube hosi parte rua Nagardjo no Fitun Estudante Lorosa’e Fc, inklui ho arbitrajen sira ne’ebé mak lidera jogu refere, hodi foti desizaun labele kontinua tan jogu no adia fali ba tempu tuir mai.
“Jogu ohin Nagardjo Fc ho Fitun Estudante Lorosa’e Fc ne’e ami bolu ona klube rua hotu-hotu foti desizaun atu jogu ne’e adia, maibé ami sei bolu hodi husu, jogu ne’e adia, maibé realiza fali bainhira ami sei anunsia fila fali”, dehan Diretór Kompetisaun LFTL Fc, Martinho Ribeiro, iha estádiu munisipál Dili, Kinta (16/03).
Nia dehan, tanba jogu refere paradu iha minutu 78, hela de’it ona minutu 12 hodi jogu termina, maibé insidente ne’e akontese entaun ekipa rua deside adia jogu ne’e, hafoin sira kontinua empate ho score 2-2.
Tanba ne’e ba jogu kontinuasaun ne’e sei mantein ho score 2-2 ne’e ka oinsá ne’e sira nia parte orasida sei haree no depende ba iha desizaun arbitrajen sira ninian, oinsá mak bele anunsia fali kona-ba ida ne’e.
Fó hanoin fali katak, insidente ne’e akontese hafoin arbitrajen foti desizaun ba ekipa Nagardjo ladún balansu, tanba iha jogu primeiru parte jogadór FIEL Fc lori liman kaer bola ka dudu bola sai arbitrajen la fó penalidade ba sira, maibé bola kona-ba jogadór Nagardjo nia liman fora hosi grander laran nia foti desizaun hodi fó penalidade ba FIEL Fc, nune’e mosu dezentendimentu ne’e.
Nune’e sira konsidera arbitrajen la hatudu nia profisonalidade no neutralidade iha jogu refere no foti desizaun arbiru no laiha konsultasaun rua hosi arbitrajen rezerva sira inklui liña sira iha parte sorin no karuk hodi foti desizaun hakarak hamonu ekipa Nagardjo Fc iha jogu refere.
1,312 total views, 3 views today
Bele hare Video Seluk :
Subscribe to Timorpost
