Dili(TimorPost)–Mediku sira iha Hospital Nasional Guido Valadares (HNGV), la konsege salva Sisto nia vida, tanba matebian tama mai iha Hospital Nasional ho kondisaun grave tiha ona.
Iha loron 14 fulan-Marsu-2023, matebian mai konsulta iha Hospital Nasionál Guido Valadares, iha rezultadu konsulta ne’e médiku sira halo diagnoze katak nia sofre moras thrombosis ho severe anemia ka moras kankru raan, moras ida ne’e mak afeta ba nia saúde.
“Matebian nia la halo tratamentu iha inísiu, situasaun grave mak mai difisil atu kura, entaun médiku sira la konsege salva matebian,”nia dehan Diretór Klínika Hospital Nasionál Guido Valadares (HNGV), Marcelino Correia, ba Jornalista iha HNGV, Sesta (17/03).
“Durante ne’e, matebian la kontrola nia moras no la halo tratamentu, ikus mai afeta ba hemorasia sa’e ba kakutak no kauza lakon nia vida”, nia hatete,
Nia hatete, bainhira pasiente ida sofre moras kankru raan, iha inisiu kedas nia tenke mai halo tratamentu, maibé ba kazu Sisto nian, pasiente ne’e dezde inisiu la halo kedas tratamentu maibé bainhira grave ona maka foin lori mai hospital, ida ne’e difisil.
Entretantu, Matebian Sisto dos Santos, atuál Diretór Ezekutivu Asosiasaun HAK, moris iha loron 25 fulan Setembru 1979 ho idade 43 husi Munisípiu Lautem, Postu Administrative Lospalos Fuiloro, Matebian mate husi nia feen kaben ho oan na’in haat, mane ida no feto tolu.
Tuir observasaun Timor Post nota katak, mate uma ne’ebé lokaliza iha Bebonuk, distánsia besik ho Otél Arbiru beach Timor-Leste, nakonu ho família, kolega ativista, amigu no sidadaun sira barak maka hakbesik an ba mate uma hosi presta solidariedade.
Entretantu, tuir ajenda, Rute lori mate isin Sisto dos Santos, mak hanesan tuir mai ne’e, Iha tuku 7:15 mate isin sai hosi uma ba Igreja Ai-mutin hodi hala’o liturjia da palavra, hafoin ne’e mate isin lori mai iha Kampaun HAK, sai hosi kampaun HAK ba fali iha Kampus Faspól, UNTL, depois kontinua ba iha CNC no ikus liu hosi CNC mate isin lori kedas ba Lospalos.
714 total views, 45 views today
