DILI (timorpost.com)—Sekretáriu Jerál Muslim (SJM), Mohammed Abdelsalam, afirma Timor Leste tenke orgullu tanba iha lider boot ida úniku iha mundu nu’udár premiadu Nobel ba Pás no mós membru importante iha família Prémiu Internasionál Zayed ba Fraternidade Umanu.
Sekretáriu Jerál Muslim (SJM), Mohammed Abdelsalam, sente onradu ho vizita surpreza ne’e, tanba konsidera katak atuál Xefe Estadu Timor-Leste ne’e nu’udár ikón no ezemplu iha mundu hotu tanba promove pás no promove valór fraternidade umana, koezaun sosiál no toleránsia.
“Ramos-Horta nu’udar ezemplu ida, hodi hatudu valór sira husi konsisténsia, respeitu no komprensaun ba malu, no ita haree iha Timor-Leste ezemplu reál ida kona-ba oinsá nasaun ki’ik ida-ne’e iha rekursu ne’ebé haraik-an, iha dalan atu hetan dame, konsisténsia no fraternidade umanu ho ninia viziñu hotu no rejiaun tomak,” SJM Mohamed Abdelsalam sublina.
Lider MCE ne’e, expressa mós nia admirasaun ba relasaun Timor-Leste ho Indonézia, iha ne’ebé, bainhira enkontru ho Prezidente Repúblika Indonézia, Joko Widodo, sempre ko’alia kona-ba relasaun bilaterál iha area oin-oin ho forte entre nasaun rua ne’e.
“Ha’u iha mensajen atu hato’o ba povu Timor-Leste katak imi tenke sente orgullu tanba maski nasaun simples no foin dezenvolve, maibé imi iha lider boot ida, Prezidente úniku iha mundu ne’ebé nu’udár premiadu Nobel ba Pás no mós membru xave ida no membru importante sira iha família Prémiu Internasionál Zayed nian ba Fraternidade Umanu, no ho fiar ida-ne’e, imi sei kontinua moris-di’ak no iha futuru ne’ebé naroman liu ba imi-nia rai, tanba imi-nia espíritu laran-metin no ezisténsia nian ne’ebé imi iha,” dehan Mohamed Abdelsalam.
Entretantu, Iha loron 14 Outubru 2023, Prezidente Repúblika Jose Ramos Horta, kontinua diskute kona-ba pás no rekonsiliasaun iha mundu, hamutuk ho Sekretáriu Jerál Muslim Council of Elders (MCE), Mohamed Abdelsalam iha sede Fraternidade Humana, sidade Abu Dhabi.
Prezidente Repúblika, José Ramos-Horta nia relasaun ho Muslim Council of Elders (MCE) dezde 2021 bainhira hahú involve nu’udár juri internasionál ba Prémiu Zayed Human Fraternity Award no kontinua hamutuk hodi dezenvolve no divulga dokumentu Fraternidade Umana.
“Sira rasik hakarak loke eskritóriu Fraternidade Umana iha Timor Leste, no eskritóriu ne’e bele utiliza de’it iha semana ida kada tinan, bainhira presiza atu halo reuniaun, hafoin ida ne’e Timor Leste utiliza ba nesesidade sira ne’ebé relasaun ho Fraternidade Umana,” explika Prezidente Horta, Seguda (16/10).
Xefe Estadu hatete, sede Fraternidade Umana ne’e harii iha Timor Leste sei kontribui liu atu halo Timor-Leste sai fatin hakiak dame no toleránsia atu sai ezemplu iha mundu no komunidade MCE.
1,737 total views, 3 views today
Bele hare Video Seluk :
Subscribe to Timorpost
