DILI (timorpost.com) – Traballadór Timoroan ida ho indentidade Candy Soares, hosi Postu Administrativu Bazartete, Munisípiu Likisá, servisu iha Korea area Peskas, hetan dezastre ho motor to’o lakon vida.
Tuir kronolojia ne’ebé haktuir hosi matebian nia kolega servisu hamutuk iha Korea, liuhosi WhatsApp, haktuir kolega ne’e hetan dezastre ho kondisaun lanu.
“Iha Korea ami hela besik malu, servisu mak fatin diferente, maibé iha area ida de’it, tuir informasaun ami rona katak iha Sábadu kalan (31/12), matebian ho kolega sira halibur han-hemu hamutuk hodi festeza simu tinan foun, hafoin matebian hemu hotu fila ba nia uma ho nia motor rasik, maibé to’o iha dalan kalaran, matebian hetan dezastre”, Eri Marques haktuir informasaun hirak ne’e ba Timor Post liuhosi WhatsApp, Domingu (01/01).
Matebian nia kolega konta, oras daudauk parte Polisia Investigasaun buka tuir hela motivu hosi dezastre ne’e.
“Parte polisia sei investiga no sei buka tuir liuhosi CCTV, tanba iha Korea, dalan públiku sira ne’e kuaze iha hotu CCTV, tan ne’e liuhosi ne’e mak ita foin hatene matebian hetan dezastre ka ema ruma mak hanoin at,” nia konta.
Entretantu, matebian servisu iha Korea hahú hosi tinan 2014, kuaze tinan naruk servisu iha Korea, iha tinan kotuk matebian fila ona ba Timor nia kontratu termina, maibé matebian nafatin hetan fiar hosi Kompañia hodi kontinua extende Re-entry.
“Matebian iha tinan kotuk nia ba Timor deskansa fulan 2, maibé matebian hetan kontaktu hosi Kompañia, hodi filafali mai Korea kontinua nia servisu,” nia haktuir.
Enkuantu fatin ne’ebé matebian hetan dezastre ba la dook hosi matebian nia servisu fatin, ezemplu iha Dili matebian hela iha Tasi-Tolu, no nia hetan dezastre hanesan iha Portu Tibar nian.
“Ami hanesan ran maluk, sente triste, tinan foun ida ne’e ami la kontente tanba ami lakon ami-nia ran maluk ida,” nia hato’o.
Alende ne’e informasaun hanesan kolega liuhosi media live streaming iha fatin akontesementu haktuir, nia la’o iha dalan mak hetan matebian nia xapeo ho Korea Metan ho emblema Bandera RDTL, ne’ebé monu besik estrada ninin, hafoin hateke tun ba rai lolon matebian toba besik hela ho nia motor (Verza mean), ho kondisaun mate.
“Iha media live streaming ne’e matebian nia kolega koa’lia katak matebian mate dezde horikalan (31/12), tanba nia isin mate Toos hotu ona, maibé nia la hatene motivu hosi mate ne’e, maibé hanesan ema timoroan ha’u hetan mate isin, ha’u rasik kontaktu direta parte polisia hodi to’o iha fatin akontesimentu, nune’e hodi evakua ba Hospital,” Timor Post sita liafuan hirak ne’e liuhosi media livestreaming ida ho ID Facebook Nando Q Loe.
3,728 total views, 3 views today
