DILI, (timorpost.com)—Xefe Estadu Maiór Jenerál, Falintil Forsa Defeza Timor-Leste, (F-FDTL), Tenente Jenerál, Domingos Raul “Falur Rate Laek” hatete loron invazaun Indonézia nian mai Timor-Leste 7 Dezembru nu’udar reflesaun ba timoroan hotu atu hametin espíritu nasionalízmu no patriotízmu
“7 Dezembru ne’e loron ida invazaun Indonézia nian tama iha Timor-Leste, iha 1975, ne’e loron reflesaun nian ba povu tomak atu halo sakrifísiu atu hametin espíritu nasionalízmu no patriotizmu”, Xefe Estadu Maior Jenerál F-FDTL, Falur Rate Laek, informa ba Timor Post, hafoin partisipa serimónia juramentu membru F-FDTL no PNTL iha Palásiu Governu, Kinta, (07/12).
Nia hatutan, “Ita hotu sente katak sakrifísiu ne’e, ohin loron buat hotu produtu ita hola ne’e loron ida-ne’e maka hahú, ne’ebé ita tenke fó valór ba sakrifísiu ne’ebé heroi sira fó sira-nia mate, fakar sira nia raan”.
Timoroan hotu hatene katak, sakrifísiu ne’ebé timoroan sira halo hahú husi 7 Dezembru mak to’o ohin loron sente liberdade no hetan independénsia.
Iha fatin hanesan, Priméiru Ministru, Kay Rala Xanana Gusmão, alerta ba membru F-FDTL ho PNTL katak, loron 7 fulan-Dezembru hanesan loron istóriku luta timoroan nian hasoru invazaun husi Tentara Nasionál Indonézia lori bandeira Mera Putih mai oho timoroan rihun 200 iha tinan 24 nia-laran.
Tanba ne’e Xefe Governu ne’e husu ba forsa armada ho PNTL tenke halo juramentu hodi hametin espíritu nasionalízmu no patriotízmu hodi serví nafatin Estadu no povu nasaun ida-ne’e nia moris dígnu.(*)
912 total views, 3 views today
Bele hare Video Seluk :
Subscribe to Timorpost
