MANUFAHI–Ministériu de Saúde (MS) orienta Serbisu Saúde Municipal sosializa programa integradu ba komunidade suku Rotuto, Tutuluro no suku Daisua Bairu Maurem, Postu Administrativu Same.
Xefe Sentru Saúde Internamentu Same (SSIS), Filipe Carlos Maria dos Santos Belo informa, atividade ne’e hala’o hodi sosializa kona-ba moras kontajioza no la’ós moras kontajioza.
“Ita lori filmajen ba loke iha komunidade nia leet iha eventu kalan no ida ne’e bazeia ba moras ne’ebé sa’e makaas iha Postu Same,” dehan Filipe ba Timor Post iha nia kna’ar fatin, Same Tersa (05/12).
Ne’e duni atividade kalan ne’e tau ona iha planu atividade saúde ninian no kada atividade realiza durante loron tolu tuir alvu ba suku ne’ebé realiza atividade ba.
“Programa ne’ebé aprezenta ba komunidade iha eventu kalan mak kona-ba inan isin rua ka saúde materia infantil oinsá eduka inan sira ba partu iha fasilidade saúde no mós fahe informasaun kona-ba nutrisaun ninian ba inan isin rua sira atu konsumu ai-han nutritivu hodi fó saúde di’ak ba oan,” nia esplika.
Nune’e fahe informasaun liu husi filmajen ba mudansa klimátika iha Timor-Leste inklui Manufahi ne’ebe sei fo impaktu moras malaria no dengue atu nune’e komunidade bele prevene an bainhira tempu udan. Fahe mós informasaun kona-ba moras Tuberkuloze (TBC).
Sira aprezenta mós programa kona-ba ijiene, tanba Manufahi deklara ona Area La Soe Fo’er Arbiru (ALFA) hodi hakat ona ba eskada Area Liman Mós (ALMO) ho ida ne’e kontinua fó hanoin ba komunidade tanba balun sintina aat ona nune’e fó hanoin bele hadi’a fila fali.
“Iha atividade eventu kalan ne’e maioria hetan partisipasaun másimu husi komunidade no sira mós iha komitmentu atu halo serbísu ekipa, karik familia balun sintina laiha ka aat sira sei hamutuk hodi hadi’a no halo,” nia relata.
Molok atu hotu nia apela ba inan aman sira atu kuidadu oan iha tempu bailoro tanba daudaun ne’e rai rahun barak no bele afeta ba labarik nia saúde. Nune’e tempu udan tenki hamos valeta kuak, uma hun no haloot kalen aat atu nune’e susuk labele hela ba hodi kria moras ba oan sira.(#)
2,223 total views, 3 views today
Bele hare Video Seluk :
Subscribe to Timorpost
