DILI, (timorpost.com) – Populasaun iha suku Fatudia, postu administrativu Venilale, munisípiu Baukau, halerik ba infraestrutura báziku hanesan eletrisidade, bee-moos no estrada.
“Durante ami suku Fatudia preokupa no ami hasoru maka infraestrutura basika, ne’ebé Prejudika ita nia komunidade sira bele asesu hanesan estrada no bee mos no eletrisidade,” Xefe suku Fatudia, Anjelinho Moises Perreira, informa jornalista sira hafoin partisipa konferénsia nasionál aniversáriu PNDS ba dala-X iha CCD, Tersa (05/12/2023).
Nia hatutan “Ami, eletrisidade kuaze iha suku Fatudia kuaze kobre hotu ona, só ida ka rua mak hela dook, distánsia dook husi estrada no liña eletrisidade mak seidauk bele asesu, maibé ida-ne’e hanesan uma komunidade sira hakarak muda sees husi área sira ne’ebé besik to’o natar sira ne’e mak seidauk hasesu, maibé ein jeralmente hetan ona ka asesu ona liña eletrisidade”.
Kona-ba estrada, iha suku Fatudia iha maibé kondisaun grave tebes atu bele faselita komunidade asesu ba merkadu, asesu ba edukasaun no asesu ba sentru saúde no seluk-seluk tan.
“Ha’u hanoin estrada ne’ebé liga ba área ka sirkula ba adeia sira ne’e iha, maibé seidauk iha kompañia ka seidauk iha Estadu ida bele tau-matan, dirasaun jerál husi suku ba fali suku Waimori, postu Vikeke vila, munisípiu Vikeke dirasaun ne’e iha no konstrusaun daudaun ne’e la’o hela,” nia subliña.
Programa ba bee-moos no estrada iha no programa ne’e la’o daudaun hela maibé presiza mellora di’ak liután, atu nune’e komunidade bele asesu ba bee-mos no estrada.
Suku Fatudia iha aldeia haat mak hanesan aldeia Baharatu, Witubu, Fatudia no Osoafu ho totál populasaun hamutuk 3.800 resin.(*)
2,550 total views, 3 views today
Bele hare Video Seluk :
Subscribe to Timorpost
