DILI (timorpost.com)- Ekipa konjuntu kompostu hosi Komisaun Funsaun Públiku, Komisaun Anti Korrupsaun (KAK) Polisia Nasionál Timor-Leste (PNTL), Ministériu Transporte no Komunikasaun (MTK), no Diresaun Nasionál Jestaun Jerál Patrimóniu Estadu (DJJPE), halo kontrolu iha terenu konsege prende karreta estadu hamutuk 71.
“Durante ne’e ami servisu ho KAK, DJJPE, PNTL, no MTK, halo servisu iha terenu konsege identifika ministériu no instituisaun hamutuk 28, ne’ebé uza karreta estadu hamutuk 71 ba halo atividade privadu,” informa Portavós KFP, Belizario Rafael Magno Pereira, iha konferénsia imprensa ne’ebé realiza iha salaun DJJPE Balide, Sesta (02/06).
Nia dehan, karreta estadu ne’ebé sira rekolla hahú iha tinan 2019 hamutuk 22, ne’e mai husi ministériu 22, iha tinan 2020 sira prende karreta hamutuk 6 mai husi ministériu 6, ne’e prosesu hotu ona no pesoál sira ne’ebé utiliza karreta refere hetan ona sansaun.
Alende ne’e, iha tinan 2022 sira mós prende karreta estadu hamutuk 43, daudaun ne’e iha prosesu nia laran hein tempu badak sei fó sansaun ba funsionáriu ne’ebé komete iha kazu refere, sei simu sansaun dixiplinár husi KFP no mós sei selu multa ba iha Banku Nasionál Timor-Leste.
Portantu tuir nia, funsionáriu ida maka komete erru hirak ne’e nia tenke ba hatán iha KAK, KFP, Tribunal hodi nune’e ba iha futuru labele akontese tan.
Enkuantu iha tinan 2023, ekipa konjuntu seidauk prende karreta ne’ebé funsionáriu balun uza ba sira-nia interese privadu hanesan uza ba oras han meiudia, ka tula oan sira ba eskola ka halo atividade privadu.
Nia dehan, funsionáriu balun komete erru iha eleisaun parlamentár uza karreta estadu ba halo kampaña partidu nian, maibé sira-nia ekipa seidauk rekolla iha terenu, maibé ba oin sira nafatin esforsu makaas hodi identifika funsionáriu ne’ebé komete ne’e mai husi ministériu ne’ebé, atu nune’e prosesa tuir lei no mós sei hetan sansaun dixiplina ne’ebé vigor ona iha komisaun funsaun publika.
Ikus liu nia dehan, ekipa monitorizasaun no fiskalizasaun ne’e bazeia ba lei númeru 80/2022 kona-ba regulamentu viatura estadu artigu 21, ekipa fiskalizasaun kompostu husi ministériu no instituisaun estadu tuir lei orgániku ida-idak nian hodi halo servisu iha terenu.
KAK Rejista iha ElPar
Portavós Pontu Vokál KAK, Euclides Vidal Madeira, hatete KAK rejista funsionáriu públiku uza atributu partidu nian hodi uza karreta estadu iha kampaña eleisaun parlamentár hamutuk 5.
“Iha tempu kampaña eleisaun parlamentár tinan ne’e, ami-nia ekipa halo monitorizasaun no fiskalizasaun iha terenu konsege identifika funsionáriu públiku uza atributu partidu nian hodi uza karreta estadu partisipa iha kampaña eleisaun nian hamutuk 5”, nia informa ba Timor Post, hafoin realiza konferénsia imprensa iha salaun DJJPE Balidi, sesta (02/06).
Nia dehan, durante ne’e ekipa fiskalizasaun sempre halo monitorizasaun iha nasionál rejista kazu tolu no nivel rejionál rejista kazu rua, iha kampaña eleitorál konsege identifika funsionáriu públiku maka uza karreta estadu ba partisipa atividade kampaña.
Kazu hirak ne’e identifika evidénsia maka foto, video no atributu partidu nian ne’ebé funsionáriu públiku ne’e rasik uza hodi partisipa iha Dili, RAEOA, no Baukau, maibé, iha munisípiu sira seluk ne’e funsionáriu balun komete maibé sira-nia ekipa la konsege identifika.
Portantu kazu hirak ne’e balun prosesu ona no balun seidauk prosesu, maibé, sira-nia ekipa sei haruka karta ba iha ministériu ne’ebé nia funsionáriu komete erru ne’e sei prosesa tuir lei haruka.
749 total views, 6 views today
