DILI— Governu Japaun liu hosi Embaixadór Japaun iha Timor-Leste apoiu orsamentu ho montante dolar Amerikanu rihun 90,895.00 USD ba Organizasaun Noun Governamentál Psychosocial Recovery and Development For in East Timor (PRADET), ho objetivu atu halo konstrusaun uma seguru ba Feto no Labarik.
“Orsamentu ne’ebé ami suporta ba uma seguru ba Feto no Labarik total hamutuk rihun 90,895 dolar Amerikanu”, dehan Embaixadór Japaun iha Timor-Leste, Tetsuya Kimura, ba Jornalista iha Bairo-Pite, Kuarta (14/03).
Nia hatete, Governu Japaun hakarak promove konseitu ida hanesan seguransa umanu, liu-liu ema ne’e vulneravel tebes, tanba ne’e mak embaixadór Japaun iha Timor-Leste koopera hamutuk ho PRADET hodi bele alkansa objetivu ida-ne’e.
“Ami kontinua suporta liu-liu vulneravel sira ba diretu feto no labarik sira hodi próteze situasaun difisil liu-liu ami koopera hamutuk ho sosiedade sivíl hodi bele haree uma ne’e ho di’ak bele ajuda ita nia oan feto no labarik sira”, tenik nia.
Iha fatin hanesan Diretór Ezekutivu PRADET, Manuel dos Santos hateten, agradese ba Governu Japaun liu hosi Embaixadór Japaun iha Timor-Leste ne’ebé fasilita ona PRADET liu-liu harii uma seguru ba Labarik no Feto hasoru violénsia doméstika.
“Ita agradese ba embaixadór Japaun iha Timor-Leste sira ajuda ona PRADET halo Uma Seguru ba Feto no Labarik sira”, hateten nia.
Nia esplika, Uma Seguru ba Feto no Labarik ninia medida luan metro 14 no naruk 16, iha kuartu neen, kuartu rua ba sala ezaminasaun médiku forensic, kuartu tolu ba kliente no kuartu ida sala akonsellamentu.
“Uma ne’e iha sala akonsellamentu hanesan sala vizitante, sala reuniaun, haris fatin no dapur inklui sala reabilitasaun atu nune’e fó espasu ba inan-feto sira mai ho labarik sira tenke deskansa iha ne’ebá”, katak nia.
Nia afirma, total orsamentu ba konstrusaun Uma Seguru ba Feto no Labarik dollar Amerikanu 90,895.00 USD la inklui moru protesaun.
“Kona-ba moru protesaun ne’e orsamentu hosi doadór sira ho total hamutuk dolar Amerikano rihun 35 USD”, nia afirma.
Apoiu ne’ebé hetan husi parseiru dezenvolvimentu liu-liu doadór sira sufisiente tebes atu fasilita feto no labarik sira.
Manuel, informa, tékniku iha PRADET kuaze hamutuk 55 resin mak halo tratamentu ba Feto no Labarik hasoru violénsia doméstiku.
1,044 total views, 6 views today
Bele hare Video Seluk :
Subscribe to Timorpost
