DILI—Tribunal Distritál Dili (TDD) julga arguidu TS tanba prátika krime ofensa ba integridade fízika simples ho forma violénsia doméstika hasoru lezada HJAP hanesan fen.
Tuir akuzasaun husi Ministériu Públiku, katak iha loron 23 fulan Novembru tinan 2020, haleu tuku 21:00, iha Bemori-Dili, arguidu TS lori ain tebe dala rua kona iha lezada HJAP nia kidan, basa dala ida kona iha lezada nia hasan, lori kapasete baku dala ida kona iha lezada nia kaba as sorin los, tuku dala ida kona iha lezada nia kaba as, lori liman basa dala rua iha hasan sorin los, no kaer iha lezada nia rentos hodi dudu ba parede.
Konsekuénsia direta husi agresaun fízika ne’e, halo lezada HJAP hetan moras maka’as iha kidan, moras makas iha kabas, moras makas iha hasan sorin los ho kanoruk, moras makas no bubu metan iha rentos. Lezada ba halo tratamentu iha PRADET no halo ezaminasaun médiku Forensic.
Kauza husi problema ne’e tanba lezada kontaktu ba arguidu atu sosa labarik nia presiza, maibé arguidu la responde, ho ida ne’e lezada la’o husi uma Taibessi ba Bemori, halo sira diskute malu, hodi mosu agresaun fízika ne’e.
Arguidu TS komete aktu ne’e ho forma livre, deliberada no konsientemente, hatene katak lori ain tebe iha lezada HJAP nia kidan no basa iha lezada nia hasan, lori kapasete baku iha lezada nia kabas sorin los, tuku iha kabas, no lori liman basa iha hasan sorin los no kaer iha lezada nia rentos hodi dudu ba parede, nuudár meiu neebé aptu, hodi hamosu ofensa ba lezada nia isin lolon no saúde. Arguida hatene katak nia hahalok ne’e, proibidu no punidu tuir lei penal.
Tanba ne’e MP konstitui arguidu TS nu’udar autór material ho forma konsumadu ba prátika krime ofensa ba integridade fízika simples ho forma violénsia doméstika, previstu no punidu tuir artigu 145 husi Kódigu Penál, konjuga ho artigu sira 2, 3 aliña a no artigu 35 aliña b, husi lei kontra violénsia doméstika númeru 7/2010.
Hatán ba akuzasaun ne’e, arguidu rekoñese faktu sita iha akuzasaun laran nee loos hotu.
“Los duni ha’u tebe lezada nia kidan dala tolu, lori kapasete baku iha kabas, no basa lezada”, arguidu konfesa iha sala julgamentu TDD, Kinta (16/03).
Arguidu deklara, iha momentu kazu nee akontese lezada halai tiha ba nia inan-aman, mak arguidu ho nia inan tuir ba iha lezada nia uma husu deskulpa, no família husi arguidu no lezada nian tuir hamutuk hodi rezolve, no husu ba arguidu labele halo tan hahalok ne’e. Arguidu mós aprende ba nia hahalok nee, no promete sei la repete tan iha futuru.
Alende nee, lezada HJAP reforsa akuzasaun husi MP nian, katak arguidu tebe dala rua iha lezada nia kidan, husi tebe ne’e halo lezada monu tun, arguidu sama tan dala ida iha lezada nia operasi fatin.
Hafoin kazu nee akontese, kalan nee lezada sei toba iha uma, dadersan mak ba halo keixa iha polisia, hodi lori liu ba halo ezaminsaun ba isin, depois lezada foti nia sasán sai husi uma, hodi ba hela ho inan-aman, liu tiha ida nee mak arguidu ho nia inan, tuir ba rezolve no prenda kedas lezada.
“Ami problema tiha, depois bolu família rezolve, to’o agora laiha ona problema”, lezada deklara.H
Hafoin rona tiha depoimentu husi parte rua, iha alegasaun Ministériu Públiku, husu ba tribunál atu kondena arguidu ho pena prizaun tinan haat, suspende ba tinan ida, tanba prienxe duni krime ofensa integridade fízika simples ho forma violénsia doméstika.
Ministériu Públiku husu pena ida ne’e, tanba haree ba depoimentu husi lezada nian no faktu hatudu katak aguidu lori ain tebe dala rua ba lezada no lori kapasete baku lezada nia liman no rentos hetan bubu no metan, halo lezada moras iha isin lolon.
Maibé parte Defeza husu ba tribunál atu hamonu pena ne’ebé adekuadu no justu ba nia kliente, tanba arguidu konfesa imparsiál no la nega faktu, inklui haree mós ba arguidu nia arrependimentu, no arguidu mós jura sei la halo tan hahalok ne’e iha futuru.
Hafoin rona tiha alegasaun husi MP no Defeza, juis ba prosesu deside marka fali julgamentu nee ba loron 30 fulan nee, hodi submete ba desizaun ikus.
Audiénsia julgamentu ne’e prezide husi juis singular Arjentino Nunes, Ministériu Públiku reprezenta husi Prokuradór Napoleão Soares da Silva, no arguidu hetan asisténsia legál husi Defensór Públiku Nelson Borges.
1,250 total views, 3 views today
Bele hare Video Seluk :
Subscribe to Timorpost
