Timor Post (27/03/2021)—Médiku timoroan sira hamutuk na’in-12 aranka ona husi Havana Kuba, tuku 9 kalan oras rai ne’eba nian.
Timoroan hirak ne’e ho aviaun sai husi Havana ba Fransa liu ba Doha ba Kuala Lumpur-Malázia no sei to’o iha Dili loron 30/03/2021 ho Aviaun Citylink.
Notísia antes Timor Post fó sai iha timoroan na’in-15 maka eskola hotu ona no prepara fila mai Timor, maibé atu aranka na’in-2 iha problema ho saúde.
Médiku timoroan João Teodosio Amaral ne’ebé sei kontinua hela estudu iha Kuba ba Timor Post haktuir, governu Timor Leste maka fasilita viajen.
“Governu mak fasilita kolega na’in-12 fila, na’in-3 parese viajen tuir fali,” João subliña.
Timoroan na’in-15 ne’ebé remata ona estudu, iha área espesialidade kardiolojía na’in-3, terapia intensiva na’in-4, nefrolojía na’in-3, neurolojía na’in-1, endokrinolojía na’in-2, no imagenolojía na’in-2.
Antes ne’e liuhusi komunikadu ba imprensa, médiku espesialista timoroan sira ezije ba governu atu fasilita lalais sira nia repartisaun tanba sira balu remata ona estudu iha tinan 2020 nia rohan.
Total médikus timoroan hala’o estudu iha Kuba hamutuk 23 (rua nulu resin tolu), na’in-17 finaliza ona estudu, na’in-15 mak simu ona diploma inklui na’in-12 ne’ebé viajen ona mai Timor no na’in-3 ne’ebé sei hela tanba moras.
Timoroan hirak ne’e sente nu’udar parte integrante husi forsa traballu Ministériu Saúde nian, ne’ebé tuir sira repatriasaun importante tebes atu kontribui fo asisténsia saúde ba povu Timor Leste, liu-liu durante situasaun pandemia covid-19, iha ne’ebé nasaun presisa tebes rekursu umanu.
“Ami nia aujénsia tinan tolu resin husi ita nia nasaun no família la’ós atu buka benefísiu ruma iha Kuba maibé halo sakrifísiu no dedika ami nia an hodi buka kuñesimentu atu fila mai serví ita nia rain, tane as nafatin espíritu nasionalizmu no patriotizmu hanesan saida mak ami halo tiha ona iha tempu kotuk serví ba ita nia povu iha áreas remotas no iha fatin ne’ebé de’it,” subliña timoroan sira. (cao)
1,110 total views, 3 views today
Oinsa Ita nia Reaksaun iha Notisia Nee?
You have reacted on “Médiku Espesialista Timoroan Na’in-12 Aranka on…”
Bele hare Video Seluk :
Subscribe to Timorpost
