ADVERTISEMENT

Maski Reforma hosi F-FDTL, Veteranu Maucori Ladauk Entrega Farda

Augusto Sarmento - Figura · Jeral
  • Share

Nia maka Sebastião Soares, veteranu ho kódigu Maucori, reformadu husi Falintíl Forsa Defeza Timor-Leste (F-FDTL).

Uluk bainhira sei eskola, nunka mehi atu sai funsionáriu públiku ka servisu iha instituisaun estadu nian balun, tanba durante funu iha ai laran, hanoin de’it maka halo funu para hetan ukun an.

ADVERTISEMENT
SCROLL FILA BA NOTISIA


Tanba nia rasik eskola to’o kuarta klase de’it, entaun laiha duni mehi atu servisu iha instituisaun estadu. Nia rekoñese, ho nivel edukasaun ne’ebé mínimu tebes, entaun nia la hanoin iha future, bele hetan servisu iha fatin di’ak, maibé nufim hafoin remata funu, nia sai fali forsa hodi kontribui ba rai doben Timor-Leste.

“Ami halo funu iha ai-laran, ho objetivu hakarak ukun rasik an, atu ita bele moris livre husi inimigu, depois funu hotu, hakarak kontribui ba rai ida ne’e liu husi servisu ne’ebé ha’u hetan, sai F-FDTL, sai lutu ba nasaun hodi asegura pás no estabilidade iha rai laran,” Manatutu oan, ne’ebé moris, iha loron 23, fulan Marsu, tinan 1955, ne’e haktuir bainhira dada lia ho Timor Post, iha Sentru Konvensaun Dili (CCD) Kaikoli, Kuarta (08/03).

“Ha’u la eskola to’o iha nivel altu, tanba ho idade 19, ha’u envolve ona iha golpe, iha munisípiu Manatutu, iha loron 11, fulan Agostu, iha tinan 1974, depois halai ba iha ai-laran, hetan kaptura husi UDT, ne’ebé la konsege eskola to’o nivel boot, maibé ha’u nia hanoin ne’e luan, maski la eskola boot,” Veteranu Maucori hateten.

Lee Mós :
Aban, MI Aprezenta Membru PNTL Reformadu Na'in-158 ba KM

Manatutu oan ne’e, hahú envolve iha ai-laran, iha tinan 1974, nia kaer kedas kilat hamutuk ho Komandante Xefe Falintil, Xanana Gusmão, hodi halo re-estruturasaun no reorganizasaun hodi organiza Manatutu laran tomak.

Iha loron 3, fulan Marsu, tinan 1981-1982, Maucori ba iha Kablaki, Manufahi ho Mau-nana, depois ba fali Manatutu, iha tinan 1995,hetan fali kapturasaun iha Manatutu, husi bapa sira, lori nia ba iha prizaun durante fulan tolu, depois sai tiha, nia ho nia kaben tuir doutrina para kaben tiha, maibé sira na’in -rua nafatin envolve iha grupu klandestina no hanesan Koordenadór Sub- rejiaun 7 to’o hetan ukun rasik an.

“Ha’u nia nivel edukasaun, maka Universidade Karau Atan (UNKA), ha’u nunka mehi atu sai funsionáriu no servisu iha fatin di’ak ruma, maibé, depois de ukun-an, ema hotu haree ba ha’u nia dedikasaun, terus iha ai-laran iha pasadu, entaun bolu ha’u ba sai Forsa, iha tinan 2002, to’o tinan 2015 foin tama ba reformadu, más ha’u nafatin simu vensimentu husi estadu,” Maridu husi Juliana de Sousa Henrique Boavida Soares, ne’e katak.

Maucori sai forsa iha F-FDTL, iha tinan 2002, hanesan sarjentu, hala’o misaun iha munisípiu Aileu, iha tinan 2002, depois muda fali ba iha Metinaru, iha tinan 2004, muda fali halo misaun iha munisípiu Lautem, la kleur de’it muda fali ba iha Baukau, iha tinan 2005.

Hotu, nia mai kontinua hala’o misaun hanesan F-FDTL, iha Metinaru, to’o iha tinan 2015 maka foin reformadu, maibé farda F-FDTL, estadu seidauk retira husi nia, entaun nia nafatin apoiu servisu F-FDTL nian, tanba kada fulan simu hela vensimentu husi governu, au-mezmu tempu simu mós subsídiu veteranu nian.

Lee Mós :
Tomam hoje posse os 21 membros que completam o Governo

vensimentu, ne’ebé nia hetan kada fulan hodi suporta ninia família, no selu oan sira nia eskola, husi primária to’o universidade no daudaun ne’e, hetan ona servisu no forma ona família, iha ona oan.

“Maski, ha’u reformadu ona, maibé nafatin esforsu hodi buka dalan no buka solusaun ba ha’u nia maluk sira ne’ebé terus iha ai-laran, mate ona, maibé, estadu seidauk rekoñese sira nia diretu, entaun ha’u esforsu hodi buka dalan, rekolla dadus hodi hatama ba komisaun omenajen,para oan sira, bele hetan sira nia aman nia diretu,” Maucori dehan.

Tuir Maucori, F-FDTL maka lutu nasaun nian, asegura estabilidade iha rai laran, entaun presiza kaer metin prinsípiu uluk nian, maka kria unidade, pás no estabilidade iha rai laran, maibé ukun rasik an hotu tiha, lider nasionál sira, la hatudu unidade ba malu.

“Uluk, ami subar iha ai-laran, ami unidade ba malu, han hemu hamutuk, halo servisu ho domin, ho objetivu ida de’it, katak mate ka moris, ukun rasik an, maibé, ukun an tiha, ukun na’in sira komesa fahe malu, tanba ida-idak mai ho ninia partidu ida-idak, entaun la rona malu, ikus mai buat la’o ladún di’ak,” Oan husi Jose Soares no Maria Joana Fatima Soares, hateten.

Lee Mós :
Filomeno da Paixão defende necessidade da criação de uma autoridade marítima

“Ha’u hanesan veteranu ida, hakarak husu ba ukun na’in, lider nasionál no lider rezisténsia sira, tuur hamutuk hatudu unidade ba malu, halo diálogu ba malu hodi rezolve povu nia preokupasaun, nune’e povu bele sente ukun rasik durante tinan rua resin rua ona, más povu kontinua hakilar ba infraestrutura báziku iha baze.”

Tuir Maucori, tempu to’o ona para ukun na’in sira tuur hamutuk hodi hadi’a povu nia moris, lori dezenvolvimentu ba povu, hodi povu bele sente duni ukun rasik an ida ne’e.

Portantu, veteran Maucori, iha maun alin hamutuk na’in-ualu, maibé alin ida mate iha funu laran, hafoin han koto moruk, nune’e lanu nia to’o mate tiha.

Depois alin ida tan mate iha tinan 1999, agora hela sira na’in- neen,, sira na’in-neen la la eskola hotu, hala’o vida hanesan peskadór, balun fali agrikultór, halo to’os no natar hodi sustenta moris família nian.

Entretantu, Manatutu oan ne’e ho nia kaben Julia de Sousa, sira iha oan na’in- haat; feto rua no mane rua.

Oan primeiru remata universidade no servisu ona, oan daruak remata universidade, agora servisu ona, oan datoluk sei iha universidade, nune’e mós oan ikun.

 1,482 total views,  6 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Maski Reforma hosi F-FDTL, Veteranu Maucori Lad…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No