DILI (Timor Post.com)—Negosiante hirak ne’ebé agora halo negósiu produtu lokál iha Merkadu Tradisionál Lesidere, sente kontente tanba hetan rendimentu di’ak.
Jíl Alexandrino de Souza Ribeiro, nu’udar negosiante produtu lokál ne’ebé kada loron sempre fa’an produtu lokál hanesan iha Merkadu refere sente hetan rendimentu sufisiente.
“Ami fa’an produtu lokál iha Merkadu tradisionál Lesidere, ami hetan rendimentu di’ak, kada loron ami bele hetan osan 100 USD, ami sente rendimentu sufisiente hodi responde ba nesesidade família no responde ba oan sira nia eskola,” Alexandrino informa ba Timor Post, iha Merkadu Tradisionál Lesidere, Kuarta (07/02/2024).
Negosiante ne’e konta, dala-ruma ema sosa liu 100 USD no nune’e mós la to’o depende ba ema ne’ebé maka hakarak sosa produtu iha merkadu ne’e.
“Ami fa’an produtu lokál ho folin la hanesan, barak liu fa’an ho presu husi 2-5 USD no bele liuhusi ne’e, depende ba produtu ninia folin”, nia esplika.
Aleinde kona-ba produtu lokál ne’ebé sira fa’an ne’e, sira mós sosa tutan husi komunidade sira husi munisípiu, ne’ebé lori mai, hafoin sira bele fa’an tutan.
“Fatin ne’ebé agora ami uza ne’e, ami sente sai hanesan fatin alternativa, hodi fa’an produtu lokál nian”, nia dehan.
Merkadu produtu lokál Lesidere hanesan fatin ne’ebé negosiante sira utiliza atu negósiu, uma barraka ida, maibé kada uma ida negosiante na’in-rua, ne’ebé totál negosiante hamutuk na’in-20.
3,402 total views, 3 views today
Bele hare Video Seluk :
Subscribe to Timorpost
