DILI (timorpost.com)—Empreza ida hosi Indonézia sei lori produtu sigarru item 5, hodi produs iha Timor-Leste.
Informasaun ne’e hato’o husi Diretór Ezekutivu Servisu Verifikasaun Emprezariál Institutu Públiku (SERVE.IP), Florencio Chances.
“Daudauk ne’e ita simu ona, pedidu balun hosi investidór nasaun ASEAN sira, mai TL hodi loke investimentu, ida mak agora sira mai ho sira nia produtu sigarru item 5, hakarak produs iha TL,” Florencio relata informasaun hirak ne’e ba Jornalista iha nia knar fatin, Hudi- Laran, Tersa (05/09).
Nia haktuir, produtu sigarru item 5 ne’e hanesan Surya Pro, L.A, Boston, Hoops, Surya Kretek . husi produtu sigaru lima ne’e sei tau marka ho TL.
Klaru sira mós iha parte seluk hatene katak governu TL bandu tanba iha impaktu ba ema nia saúde, maibé iha liman sorin seluk sira hare no hateten sei iha reseita di’ak ba estadu.
“Sira mai ona hasoru ita, sira mai kedas ho sira nia produtu 5, no ha’u mós hatete ona ba sira katak, imi filafali ba halo imi nia proposta filafali mai TL, lori ba iha entidade relevante atu nune’e bele review sira nia proposta ida ne’e”, nia hato’o.
Iha parte seluk, Florencio mós informa, empreza ida ne’e mós hakarak atu dezenvolve uma “apartamentu” hirak ne’ebé se bele karik timoroan sira atu hela ba, tanba sira mós akompaña TL ninia Planu Dezenvolvimentu Nasionál 2011-2023, sira mós le ona katak sira hakarak halo investimentu ba abitasaun.
“Hau hatete ona ba sira katak, ami mós iha ona lei regula katak, se konstrusaun ba uma ne’ebé atu fornese ba iha ami nia merkadu uma labele halo ba sorin, maibé tenke konstrui ba leten, tanba timor rai kiik, sira konkorda halo uma ba leten, tanba nasaun hotu iha mundu hakarak konstrusaun uma labele halai ba sorin maibé halai hotu ba leten”, nia hato’o.
Tanba ne’e mak, SERVE.IP husu empreza refere fila lai ba Indonézia, halo proposta ofisial ida mai, tanba SERVE.IP nia tutela ba iha ministru asuntu ekonomia.
“Sira fila ona, la too fulan ida sira iha ona Timor, tanba sira mós hanoin katak hakarak investe tan iha portu no aeroportu, buat sira ne’e di’ak hotu mai TL”,
SERVE.IP rekomenda ba sira hatama proposta hodi bele hetan aprovasaun hosi Governu, liuliu ba iha Ministériu Justisa, rai ne’ebé mak sira hakarak, empreza refere husu ona rai ba SERVE, maibé dehan ona ba sira katak, Governu TL iha ona planu, la’ós planu iha lei maibé iha mós rai ne’ebé aloka ba investimentu la sala iha Likisá.
“Se Governu mak aprova sira nia planu investimentu produs sigarru iha Timor, agora ita seidauk sente, maibé depois tinan ida rua ba oin ita sei sente katak benefísiu ita hetan ona”, Florencio hato’o.
1,442 total views, 3 views today
Bele hare Video Seluk :
Subscribe to Timorpost
