Dili (Timor post.Com)—Plataforma Nasionál Be’e ne’ebé organiza husi membru HAK, EFTL, DFFTL, OTRT, husu Komisaun E Parlamentu Nasionál halo audiénsia liga ba dezenvolvimentu setór bee no saneamentu iha Timor-Leste.
Objetivu husi audiénsia ne’e atu hato’o rezultadu auditoria ne’ebé mak hala’o ona iha tinan kotuk liu-liu liga ba fornesimentu Be’e moos iha Munisípiu tolu iha area rural.
“Ita husu audiénsia ho komisaun E hodi relata ita nia deskobrimentu, monitorizasaun no informasaun sira, liu husi dadus sira ne’ebé rekolla tanba Komisaun E ne’ebé trata ba asuntu Infraestrutura no fokus ba dezenvolvimentu báziku sira”. Hatete Koordenadór Plataforma Nasionál Be’e, Januário Amaral ba Jornalista sira iha Parlamentu Nasionál Kuarta (20/09).
Ohin akompaña mós husi membru ou parseiru sira ne’ebé mak durante servisu hamutuk hodi hala’o servisu fornesimentu bee iha munisípiu sira inklui advokasia liga ba Orsamentu Estadu kada tinan iha bee no saneamentu inklui polítika sira ne’ebé ligasaun ho bee no saneamentu.
Liga ba fornesimentu bee moos ba komunidade sira sufisiente ona too agora seidauk tanba bazeia ba deskobrimentu sira ne’ebé hetan husi atividade auditorisial sira iha sistema neen kuaze problema boot liga ba fornesimentu bee ne’ebé seidauk adekuadu no asesivel.
Nia dehan, husi audiénsia ne’e bele relata ba membru Komisaun E para oinsá atu hare Setór ida ne’e liu-liu iha prosesu agora daudaun ne’e elaborasaun ba Orsamentu Jerál Estadu (OJE) ba Tinan 2024 nian, bele integra ba Asuntu Be’e Saneamentu Hygiene iha alokasaun Orsamentu Jerál estadu ba Tinan 2024 nian.
“Iha audiénsia ne’e fokus mós ba advokasia liu-liu halo ba alokasaun Orsamentu Estadu kada Tinan Be’e no Saneamentu no mos ba polítika Sira ne’ebé Mak ligasaun no Be’e Saneamentu iha Timor-Leste”. Nia dehan.
Tanba ne’e ohin mensiona liu-liu deskobrimentu ne’ebé mak ita hetan husi atividade sira liu-liu iha munisípiu tolu ne’ebé mak Plataforma halo atividade Auditoria ba iha sistema ne’e kuaze problema bo’ot liu-liu iha area rural ligadu ba fornesimentu bee ba komunidade sira hanesan vulneravel ho Ema defisiénsia inklui no inan Feto Sira.
“Iha area rural fornesimentu bee mós seidauk kategoria adekuadu no mós asesivel, tanba kuaze sistema hira ne’ebé iha la asesivel ba Ita Nia maluk Sira”.
Seluk mós Fornesimentu Be’e la regular tanba dala ruma iha tempu Bai loron Rekursu Be’e la natoon, halo komunidade sira susar atu asesu ba be’e moos, ho dalan seluk mak tenke ba kuru iha Mota-Laran.
860 total views, 3 views today
Bele hare Video Seluk :
Subscribe to Timorpost
