Deklara rikusoin ba Tribunal ne’e tanba Lei númeru 7/2020, hosi loron 26 fulan Agostu, kona-ba Medida Prevensaun no Kombate Korrupsaun mak obriga ka haruka servidór estadu sira atu deklara rikusoin ne’ebé mak iha ne’e.
Objetivu hosi deklara rikusoin ne’e atu hametin integridade no konflitu interese sira hodi nune’e bele haree kona-ba kada servidór estadu sira ninia rikusoin ne’ebé mak nia iha, durante ninia mandatu.
Maibé maski lei mak haruka nune’e, mas realidade ita haree servidór estadu sira ladún ativu hodi deklara sira ninia rikusoin iha tribunal no pior liután mak órgaun soberanu sira.
Enkuantu, iha publikasaun jornál diáriu Timor Post edisaun Segunda (18/09) iha pájina primeiru, Prezidente Parlamentu Nasionál (PPN), Maria Fernanda Lay, hatete, deputadu sira aprova tiha lei kona-ba deklara rikusoin, maibé lakohi ba kumpre ne’e tenke simu ninia konsekuénsia.
Ida ne’e hatudu katak, deputadu sira iha Parlamentu Nasionál ne’e sira mak aprova tiha lei númeru 7/2020 ne’e, maibé deputadu sira rasik mak viola fali lei refere, tanba la ba deklara sira nia rikusoin iha Tribunal.
Kona-ba loron determinasaun ba deputadu no deputada sira atu presta deklarasaun rikusoin ne’e determina iha loron 15 fulan Setembru ne’e, maibé ita lahatene deputadu na’in-65 ne’e sesé mak ba deklara ona nia rikusoin.
Los duni katak, kestaun sira hanesan ne’e bainhira ita la kumpre no tenta atu viola nafatin, entaun korrupsaun sei buras ba bei-beik iha rai ida ne’e no fundu mina-rai mós sei mohu lalais de’it.
Tanba ne’e, obrigatoriamente servidór estadu sira tenke presta deklarasaun rikusoin saida de’it mak iha durante mandatu, tanba lei hatete klaru hela, maibé implementasaun ne’e mak ladún tau ba iha seriedade.
Espera katak, servidór estadu sira hahú hosi órgaun soberanu haat mai to’o funsionáriu sira sei kumpre lei númeru 7/2020 ne’e hodi bele ativa deklara sira ninia rikusoin atu nune’e bele kombate korrupsaun iha rai laran.
6,999 total views, 3 views today
Bele hare Video Seluk :
Subscribe to Timorpost
