Dili (timorpost.com)—Vice-Primeiru Ministru, Ministru Koordenadór dos Assuntos Sociais no Ministru do Dezenvolvimentu Rural, Habitação Communitarian Mariano Assanami Sabino, realiza primeira enkontru koordenasaun ho ministériu sira ne’ebé iha relasaun servisu ba assuntu sosiais nian.
“Ministériu sira ne’ebé tama iha liña koordenasaun Ministru Koordenadór Assuntus Sosiais nian hodi atualiza informasaun ba implementasaun programa prioridade loron 120 nian mak hanesan, Ministériu Saúde, Ministériu Edukasaun, Ministériu Ensinu Superior, Siénsia no Kultura, Ministériu Solidariedade Sosiál no Inkluzaun, Ministériu ba Asuntu Kombatente Libertasaun Nasionál, Ministériu Juventude Desportu, Arte no Kultura”. Informasaun refere Timorpost.com sita husi 𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂, Kinta (14/09/2023).
Parte Ministériu Saúde nian atualiza programa ne’ebé prioridade hodi rezolve iha loron 120 nia laran mak hanesan, moras dengue, TBC, má nutrisaun no mellora jestaun ba distribuisaun medikamentu, mellora atendimentu públiku iha HNGV, Sentru saúde no Postu Saúde sira.
Ministériu Edukasaun nian atualiza programa prioridade hodi rezolve iha loron 120 nia laran mak hanesan, problema profesores kontratadu no voluntáriu, resolve problema merenda eskolár.
Ministériu Ensinu Superior, Siénsia no Kultura, sei fó prioridade ba asuntu melloramentu kualidade ensinu no hasa’e kualidade dosente sira iha area lingua nian.
Ministériu Solidariedade Sosiál no Inkluzaun, sei resolve pagamentu ba idozus, seguransa sosiais.
Ministériu ba Assuntu Kombatentes Libertasaun Nasionál, sei fó prioridade ba halot restu mortais, verifika dadus Antigus Kombatentes Libertasaun Nasionál ne’ebé rejista iha 2009 ne’ebé to’o ohin loron seidauk remata.
Ministériu Juventude Desportu, Arte no Kultura, nia fó prioridade ba polítika desportu no arte marsiais, no buka solusaun ba Assosiasaun desportivas sira ne’ebé durante ne’e sei iha deferénsia.
Tanba ne’e, oinsá kontinua kria enkontru mensal ho regularmente no nakloke liu ba ajente sira ne’ebé fó apoiu ba ministériu sosiais sira no organizasaun lubuk ida ne’ebé mak presiza halo koordenasaun hodi sinkroniza programa sira atu asaun bele la’o ho di’ak.
Ministériu Koordenadór responsabilidade hodi halo akompañamentu ba asuntu prioridade, inter ligadu ba ajénsia, embaixada no nasaun doadores sira apoiu atu bele servisu hamutuk ho di’ak nune’e asaun ne’e tenke di’ak iha kraik no ikus liu mak halo monitorizasaun, avaliasaun katak, programa sira ne’e efetivu duni no tenki atinje tarjetu.
597 total views, 3 views today
