Zecafriado: “Arsénio Bano Bosok Dala Tolu Ona”

by -1.162 views
Komunidade sira tuur hela hodi rona esplikasaun husi delegasaun ekipa RAEOA iha edifisiu RAEOA-ZEESM Farol. (Foto TP/Maria Lizia)

(Reportájen Orlando Oqui)

DILI (Timor Post) – Komunidade ho estudante Oekusi-oan hamutuk na’in 500-resin ne’ebé toba semana ida ona iha edifísiu RAEOA-ZEESM, lamenta tebes ba desizaun Prezidente autoridade RAEOA, Arsénio Bano nian.

Portavós estudante Oekusi-oan, Zecafriado Coa hatete, Prezidente autoridade RAEOA, Arsénio Bano, promete ho bosok dala tolu ona katak atu mai iha Dili hodi buka solusaun ba komunidade Atoni-oan sira ne’ebé toba iha edifísiu RAEOA-ZEESM Faról-Dili.

“Ha’u hanesan portavós ha’u sente laran moras tebes, tanba promesa ne’ebé prezidente autoridade RAEOA promete mai ami dala tolu ona ne’e seidauk realiza”, haktuir Zeca ba Timor Post hafoin hasoru malu ho ekipa RAEOA hodi buka solusaun ba Atoni-oan sira ne’ebé toba semana ida ona iha edifísiu RAEOA-ZEESM Faról, Tersa (25/05).

Portavós estudante Oekusi-oan, Zecafriado Coa. (Foto TP/Maria Lizia)

Tuir nia, durante ne’e Atoni-oan sira toba iha edifísiu RAEOA-ZEESM ne’e hodi hein hela desizaun husi Prezidente autoridade RAEOA, Arsénio Bano nian, maibé depois delega de’it ekipa ida mak mai iha Dili mas la iha solusaun ruma.

“Ekipa RAEOA mai fó fali razaun oioin de’it, ida ne’e mak halo ha’u triste totalmente, tanba apa ho ama sira toba iha ne’e terus liu ona, no pior liu tan mak haruka ema mai ameasa fali ami iha ne’e”, hatutan nia.

Tanba ne’e, nia husu ba Prezidente autoridade RAEOA, Arsénio Bano liuhusi ekipa ne’ebé delega ona mai Dili atu foti ona solusaun imediata ba komunidade no estudante sira ne’ebé toba iha edifísiu RAEOA-ZEESM ne’e.

Enkuantu ekipa RAEOA ne’ebé mak mai kompostu husi staff gabinete Prezidente autoridade na’in lima mak hanesan Nilton R. Pereira, Arnold Suni, Fatima Olga Hei Amaral, Sergio Nessi Quefi no João Eleuterio Freitas.

Antes ne’e, Prezidente Autoridade RAEOA, Arsénio Bano, hatete Autoridade Oekusi kontinua halo esforsu prepara kondisaun iha Oekusi no harii kapasidade kuarentena ba ema na’in 100-200 iha portu Mahata, hodi bele simu no fasilita pasajeiru sira mai husi Dili.

“Iha semana ne’e nia laran, prosesu konstrusaun sei hahú. Objetivu husi polítika ida ne’e atu kontinua prevene moras la tama no mantein kontrola Covid-19 iha RAEOA hodi bele proteje ita nia inan aman sira hamutuk na’in 85000 iha RAEOA, ne’ebé agora daudauk provisoriamente seguru tan laiha tranzmisaun lokál ka komunitaria”, afirma nia.

Nia husu ba hotu-hotu iha Dili kontinua buka dalan hodi hetan vasina AstraZeneca no hakbesik-an ba Governu sentrál hodi hetan tulun ba ai-han seluk ne’ebé Governu deside atu oferese ba komunidade hotu-hotu iha Dili.

“Autoridade sei kontinua informa situasaun ne’e ba Governu sentrál hodi fasilita tulun ba ita boot sira iha rai boot. Prioridade importante mak inan aman no maluk sira na’in 85000 hela iha Oekusi seguru husi moras Covid-19”, hatutan tan nia.

Autoridade RAEOA lakohi foti risku hatama RAEOA iha situasaun tranzmisaun lokál no tranzmisaun komunitaria Covid-19, tanba fasilidade Saúde iha Oekusi iha Hospital hanesan oxygen no ventiladór seluk tan limitadu.

Nia dehan, Oekusi mós iha komunidade barak, ferik no katuas ne’ebé iha moras TB, tensaun, hepatitis ne’ebé frajil ba Covid-19 atu oho ema bainhira sira hetan moras Covid-19.

Prezidente autoridade RAEOA-ZEESM ne’e hatutan, bainhira kondisaun kuarentena sufisiente ona autoridade RAEOA sei normaliza hodi transporta ema no sasán ba mai Oekusi-Dili.

“Husu pasiénsia hodi ita konsege hasees Oekusi husi moras Covid-19 liuliu tranzmisaun lokál no tranzmisaun komunitaria. Maski ita boot sira hirus lagosta desizaun ne’e maibé prioridade mak ema 85000 atu labele hetan moras hada’et Covid-19 iha RAEOA”, hakotu nia.(Lee notísia seluk iha Jornál Timor Post)

No More Posts Available.

No more pages to load.