Xina Atu Harii Ospital Militár iha Timor Leste

by -606 views
Tenente Jenerál Lere Anan Timur akompana husi nia espoza Cidália Mesquita Ximenes entrevista ho Jornalista. Foto TP: Cardenio Alves

Jornalista Estajiáriu Cardenio Alves / Editór Noémio Falcão

Dili (Timor Post)—Xefe Estadu Maior Jeneral F-FDTL, Tenente Jenerál Lere Anan Timur, haktuir, governu Repúblika Popular Xina maka fó apoiu atu harii ospital militar iha Timor Leste ne’ebé tuir planu konstroi iha Metinaro, Dili.

Lere dehan, planu ne’e iha ona tinan 2020. “Ko’alia ho embaisador Xina, sira prontu atu harii ospital militar ba nasaun Timor Leste,” Lere hatete ba Jornalista sira hafoin ba kontrola nia saúde (check up) iha Kuartel Polísia Militár, Kintal Boot, Dili, Tersa (23/11/2021).

Lere dehan, ospital militár ne’e tuir planu sei halo atendimentu mos ba veteranu no membru Polísia Nasionál Timor Leste.

Kona-ba saúde hafoin check up, Lere dehan seidauk rona rejultadu husi doutor sira maibé nia komenta katak maske idade boot ona maibé sente saúde sei joven hela.

“Ha’u nia kondisaun ohin check up ha’u lahatene los, tanba ita katuas-ona no ita nia idade mos la’o ba bei-beik, maibé ha’u sente ha’u joven nafatin,” Lere komenta.

Tenente Jeneral ba check up akompañia husi nia espoza, atual Deputada husi bankada FRETILIN, Cidália Mesquita Ximenes.

Atividade check up hala’o ba membru F-FDTL hotu. Lere dehan, check up ne’e atu identifika bebeik membru sira nia saúde, tanba nia hakarak membru hotu tenke estavel.

Durante ne’e doutor sira halo ona check up ba membru sira liu rihun maioria husi komponente terestre mak seidauk.

Entretantu Xefe Saúde Militar, Tenente Koronel Guido de Oliveira hatete, ezaminasaun ida ne’e ba forsa tomak, prosesu ida-ne’e hahú iha loron 11 outubru 2021.

“Check up ida ne’e atu identifika tipu moras saida mak iha F-FDTL nia laran, dadaun tim ne’e kompostu husi fatin tolu, hanesan Ospital Nasional Guidu Valdares (ONGV), koopera mos Fundasaun Klínika Klibur Domin iha Tibar, atu bele halo ezaminasaun másimu ba forsa sira atu moras a’at labele kontamina fali ba forsa seluk,” Tenente Koronel Guido subliña.

No More Posts Available.

No more pages to load.