Xefe Uma Sivíl Prezidénsia Repúblika Vizita Toos Kuda Murangu iha Maubisse

by -447 views

Maubisse (Timor Post)—Xefe Uma Sivíl Prezidénsia Repúblika, Francisco Maria de Vasconcelos, iha loron 16/08/2021 vizita grupu produtivu Haburas Maubisse, ne’ebé prodús morangu iha Suku Maubisse Vila.

Xefe Grupu, Francisco Xavier do Rego, esplika, grupu hortikultura ida ne’e eziste dezde 2000 no halibur uma-kain 12, ne’ebé iha 2016, komesa hahú dezenvolve produsaun morangu, liu husi Programa Avansa Agrikultura, ne’ebé finansia husi Ajénsia Estadus Unidus ba Dezenvolvimentu Internasionál (USAID-sigla iha Inglés).

Programa ne’e fasilita sira ho fini morangu husi California, Estadus Unidus Amérika no treinamentu oinsá kuda no dezenvolve produsaun morangu iha Bandung, Indonézia.

“Grupu ami-nian ne’e ami harii hamutuk ho komunidade sira. Ami foti ema ida husi família ida. Kada família ida-idak ho “nia to’os” (kanteiru). Kuandu nia badinas nia rendimentu ne’e maka’as, kuandu nia baruk, nia rendimentu tuun”, dehan Francisco do Rego, ne’ebé informa morangu ne’ebé sira prodús orgániku no la uza adubu-kímiku ka fabrikadu.

Nia haktuir, husi kanteiru grupu nian, ho luan 1.50 ha, kada loron tolu sira koileta morangu kilo 100. Hafoin tau iha embalajen-plástiku 200 g no 400 g, morangu ne’ebé koileta ona, sira distribui tuir pedidu husi loja sira iha Díli. Kada embalajen morangu ho 200 g, sira fa’an $1.00 no 400 g ho folin $ 2.00. Rendimentu husi negósiu morangu, kada fulan, sira bele hetan to’o $ 1000.

Iha tempu bailoron hanesan agora, “ami-nia problema mak laiha bee, ida mós kuandu udan-boot bele estraga saida mak ami kuda, tanba ne’e, presiza halo estufa (greenhouse) hodi proteje husi udan no loron ne’ebe mana’asliu”, dehan Francisco do Rego, ne’ebé relata aleinde morangu, sira mós prodús produtu hortikultura seluk hanesan mostarda, repollu, brokoli, alfase, ai-manas no seluktan. Maibé merkadu ba produtu sira ne’e seidauk tuir sira-nia espetativa hodi hasa’e rendimentu.

Francisco do Rego informa, sira-nia grupu mós fó asisténsia téknika hodi hamosutan grupu lima iha Suku sira seluk iha Maubisse hanesan iha Suku Aituto, Suku Horai-Ki’ik no Suku Maulau. “Apoiu ne’ebé ami fó, amí fó voluntáriu. Ami prontu atu apoiu komunidade sira seluk”, dehan Francisco do Rego, ne’ebé hetan mós koñesimentu tékniku hortikultura iha Guangzhou, Xina.

“Ita ba tuir treinamentu, ita mai, fó buat foun ba komunidade no sira kontente. Ha’u orgullu tebes, tanba hanesan, ita transforma tiha komunidade lubuk ida. Dalaruma ita bele dehan, to’os hanesan uluk, katuas sira halo ne’e, agora ita halo mudansa, ita dezenvolve sai di’akliutan”.

Ko’alia kona-ba vizita Xefe Uma Sivil iha sira-nia fatin, Francisco do Rego, hateten: “Ami orgullu tanba ami-nia grupu ne’e bele hetan vizita husi husi Xefe Uma Sivil. Ami agradese. Tanba durante ne’e ami halo buat lubuk ida, maibé hanesan ema atu apoiu ami ne’e laiha. Ami mesak de’it mak halo. Avansa ajuda ami ne’e (Programa Avansa Agrikultura) tinan haat, husi 2016 to’o 2020. Depois ida ne’e, laiha ona apoiu”.

Tuir Xefe Suku Maubisse Vila, Wilson Níveo Mendonça, “ kuaze grupu sira ne’ebé estabelese ne’e, liuliu strawberry (morangu) nian ne’e, nunka hetan apoiu husi Governu, maibé sira hetan de’it apoiu “50-50 (%)” husi USAID Avansa. Ami nunka hetan vizita husi MAP (hodi apoiu grupu kuda morangu). Durante ne’e, so husi MTCI (Ministériu Turizmu,Komérsiu no Industria) ho Sekretáriadu Estadu kooperativa maka sempre vizita hodi ko’alia kona-ba oinsá atu asesu kréditu ho jurus ki’ik, maibé tanba grupu barak seidauk iha legalizasaun kompletu hanesan husi SERVE nian ne’e maka dalaruma, halo sira seidauk asesu ba kréditu”.

Nia hatutan, “hanesan autoridade lokál, ami sente kontente, orgullu, tanba Prezidénsia Repúblika bele vizita netik grupu sira. Ida ne’e ami kontente tanba bele enkoraza nafatin grupu sira, atu nune’e bele badinas liutan hodi haboot sira-nia atividades no iha sustentabilidade ba futuru”.

Wilson Níveo Mendonça husu Estadu bele investe iha setór indústria, hodi bele diversifika produtu lokál sira ne’ebé komunidade iha, nune’e bele sai hanesan fonte rendimentu ba komunidade hodi hadi’a sira-nia moris.

Xefe Suku ne’e informa, grupu hortikultura ne’ebé oras ne’e eziste iha nia Suku hamutuk 28

“Sira hatudu duni progresu di’ak. Ha’u hanoin ida ne’e presiza fó apoiu. Governu presiza fó apoiu inisiativa ne’ebé di’ak tebes. Sira fó dadaun ona. Maibé iha ita-nia sosiedade la’os osan mak importanteliu, maibé koñesimentu, kapasidade no jestaun ne’e mak importanteliu. Osan ne’e hanesan instrumentu atu dudu inisiativa sira ne’e para buras liutan”, subliña Xefe Uma Sivil, ne’ebé konsidera merkadu ba produtu sira ne’e depende ba kualidade produtu sira ne’e rasik. “Kuandu ita prodús la’os de’it kuantidade, prodús ho kualidade merkadu sei nakloke”.

Prezidente Francisco Guterres Lú Olo iha okaziaun barak fó hanoin bebeik, importánsia Estadu dezenvolve ekonomia ida ne’ebé sustentánvel. Ba ida ne’e, Governu presiza investe iha setór sira produtivu no “povu tenki prodús rasik. Katak ita tenki independente ba ita-nia produsaun, ba ai-han ita-nian, atu nune’e ita bele ba oin’ no hamenus dependénsia ba fundu minarai nian.

 

Mídia PR

No More Posts Available.

No more pages to load.