Xefe Estadu Falta iha Asembleia Jerál Nasoens Unidas

by -305 views
Logo Organizasaun Nasoens Unidas (ONU)

DILI (Timor Post)—Prezidente Repúblika Francisco Guterres Lú Olo kansela nia viajen ba New York-Estadus Unidus Amérika (EUA) tanba rajaun saúde. Tuir ajenda antes ne’e Xefe Estadu ho nia delegasaun hala’o viajen iha loron 13/09/2021.

Fonte kredivel Timor Post haktuir, Lú Olo foti desizaun ne’e maske preparasaun ba viajen la’o ona fulan hirak ikus ne’e hodi partisipa asembleia jerál nasoin unidas (United Nations General Assembly).

Tinan ida ne’e, asembleia jeral nasoens unidas hala’o iha loron 14/09/2021.

Asembleia jerál nasoens unidas nu’udar órgaun másimu ba formulasaun polítika organizasaun nian. ONU akomula membru husi nasaun hamutuk 193 inklui Timor Leste. Kada tinan hala’o asembleia hodi halo diskusaun multilateral kona-ba aspeitu internasional hotu.

“Visa ba viajen nian mos iha ona maibé PR kansela ho rajaun saúde,” fonte iha Palásiu Prezidensiál haktuir.

Liga ho problema moras daet COVID-19 ne’ebé mundu infrenta, antes ne’e Premiadu Nobel da Paz nu’udar mos eis Prezidente Repúblika, José Manuél Ramos Horta husu ba Lú Olo atu kansela tiha viajen.

Horta dehan, nia la fiar Lu Olo ba Amérika Prezidente Joe Biden hakarak hasoru malu.

Horta hatutan, Lu-Olo lalikan gasta tempu sai ba rai liur no túr hakmatek de’it.

“Avo Lu-Olo agora katuas no beioan iha ona di’ak liu túr hakmatek hodi haree beioan sira. Duke sa’e aviaun ba halo saida iha rai liur ne’eba,” Horta hatete.

Entretantu Prezidente Repúblika Francisco Guterres Lu Olo, iha loron 16/08/2021 adia nia viajen ba Munisípiu Ainaro no Manufahi tanba rajaun moras. (cao)

No More Posts Available.

No more pages to load.