Xanana: “Tanbasá Mak O Husik Tiha Ami “Dusae”

by -510 views
Prezidenti Partidu CNRT Kairala Xanana Gusmao fo omenajen ikus ba Saudozo Eduardo De Deus Barreto "DUSAE" iha Sede CNRT iha bairru Grilos, Kinta 27/05. (Foto TP/Maria Lizia)

(Reportájen Cezário Sousa/Editor Suzana Cardoso)

DILI (Timor Post) – “Bainhira ita hasoru malu iha Ermera, ita hamutuk kria zona de gerilla foun ida hodi ita nia forsa bele ba too iha ne’ebá. Maibé, tanbasá o husik tiha Ami Dusae. Vida kala hanesan ne’e duni. O uluk tiha ona ami sei tuir,.”

Tanis Presidente Partidu Congresu Nasionál Rekonstrusaun Timor-Leste (CNRT), Kay Rala Xanana Gusmão iha Sede CNRT bairru Grilos, molok despedida Saudozu Dusae nia isin mate, Kinta, (27/05/2021).

Mate isin Dusae hatun husi avaiaun iha Aeroportu Prezidente Nicolau Lobato, Kuarta, (27/5/2021). (Foto TP/Maria Lizia)

Ho ida ne’e, Xanana husu ba saudozu Dusae iha maromak nia kadunan atu husu ba Maromak atu tau matan mai povu susar tebes hanesan agora ne’e. “Kumpri nafatin O nia devér hanesan kuadru CNRT iha leten ne’ebá , harohan ba Maromak hodi ita bele hetan konfiansa nafatin no kbiit atu hatuur fila fali estadu de direitu demokrátiku ne’e,” Xanana harohan ba Dusae nia klamar.

Ho matan been, Lider karizmátiku ne’e hatete, harohan ba Dusae atu tau matan nafatin ba povu no rai ida ne’ebé hori uluk kedas fó isin lolon, hanoin no kosar been too ikus mai O husi Ami derrepente de’it.

Familia hein Mate Isin Saudozu Dusae Iha Aeroportu Prezidente Nicolau Lobato, Kuarta, (27/5/2021). (Foto TP/Maria Lizia)

Atuál Presidente partidu CNRT dehan, ho situasaun covid-19 bainhira Dusae moras sira labele ba, maibé fila ona ba aman maromak nia kadunan santu tau matan ba povu no nasaun ida ne’e.

Mate isin Saudozu Eduardo de Deus Barreto “Dusae” too iha aeroportu internasionál Nicolau Lobato Komoro, kinta 27/05 iha tuku 14:50 otl. Iha area Aeroportu Komoro nakonu ho parente, família no kolega sira hodi nune’e hein eis deputadu nee nia mate isin, tuir ajenda sei lori ba Sede Partidu CNRT nian molok ba nia rezidénsia iha tasi Tolu.

Preparasaun Militante iha Sede CNRT hodi hein Mate isin Saudozu Dusae. (Foto TP/Maria Lizia)

Eis Deputadu nee hakotu iis iha ospitál Karawaci Jakarta Barat Indonesia iha tuku ualu ho balun da dersán.

Saudozu Eduardo de Deus Barreto “Dusae”, moris iha tempu kolonizasaun portugeza nian, iha aldeia Aiceo, Suku Raimerhei, Munisípiu Ermera, iha dia 14 de Agostu 1951.

Hafoin tun husi aviaun, Mate isin Saudozu Dusae transporta ba Sede CNRT. (Foto TP/Maria Lizia)

Dusae sai nu’udar deputadu iha Lejizlatura daruak no re-eleitu ba lejizlatura datoluk, no nia mós assume kargu hanesan deputadu ativu komisaun trata asuntu veteranu no komisaun B trata asuntu negósiu estranjeiru, defeza no seguransa iha parlamentu nasionál.

Ho triste família no parente sira simu eis deputadu ka veteranu nee ho matabeen. Iha aeroportu hein husi família, kolega inklui Amu Domingos Maubere no madre balun.

Hafoin too iha Sede Partidu, Congresu Nasionál Rekonstrusaun Timor Leste (CNRT), simu husi kuadru partidu nian hamutuk ho presidente partidu Xanana Gusmão.(Lee notisia seluk iha jornál Timor Post)

No More Posts Available.

No more pages to load.