Xanana Partisipa Julgamentu hasoru Eis Padre Amerikanu iha Tribunál Oekusi, Odamatan Taka ba Públiku

by -170 views

Timor Post (22/02/2021)—Líder Nasionál Kay Rala Xanana Gusmão, ohin dader tuku-ualu-liu, marka ona prezensa iha Tribunál Rejiaun Autonomu Espesial Oekusi Ambeno (RAEOA) hodi partisipa julgamentu hasoru eis Padre Richard Dascbach ne’ebé akuzadu komete kazu pedofilia iha orfonato Topu Honis.

Xanana to’o iha tribunál hafoin Eis Padre Richard akompaña husi komandante polísia rejiaun ne’e nian iha ona fatin hodi hein ofisial justisia sira konvida tama ba sala julgamentu.

“Julgamentu ne’e taka ba públiku. Ami labele tama ba laran. Maun Boot mak iha laran. Eis Padre ne’e ohin to’o uluk iha ne’e (tribunál),” komunidade ida ne’ebé lakohi temi nia identidade ba Timor Post via telefone bainhira observa situasaun atuál iha Tribunál Oekusi.

Xanana ho Richard viajen hamutuk husi Dili ho ró Succes Susceco ba Oekusi iha loron Kinta (18/02/2021) no to’o iha Oekusi, Sesta (19/02/2021).

Xanana nu’udar mós sasin liga ba Eis Padre Richard nia kazu bainhira julgamentu hala’o iha Tribunál Distritál Dili (TDD).

Richard Dascbach, moris iha loron 26 Janeiru 1937 iha Pennsylvanian, Estadus Unidu Amérika (EUA) lori misaun evanjelizasaun Katólika tama iha Oekusi iha tinan 1972.

Nia ordena sai padre iha tinan 1965, no liu tinan rua de’it, nia mai ona Nusa Tenggara Timur (NTT) no ikus liu tama ba Ambeno iha tinan 1972.

Invazaun Indonézia mai Timor-Leste, nia hela iha Oekusi to’o tinan 1999 no konsege subar joven lubuk ida hosi atakasaun pro-integrasionista.

Durante hala’o misaun evanjelizasaun, nia harii uma mahon ida ho naran Topu-Honis (Guide To Life) iha tinan 1993 ho objetivu atu fó mahon ba labarik kbi’it la’ek sira.

Tuir artigu ne’ebé fó sai iha Tatoli, rezultadu hosi orfonatu Topu Honis, konsege lori nia amigu sira hosi Amérika hodi halo adosaun ba Ambeno oan na’in-hitu (7) oras ne’e eskola ramata ona. Sira-nia ensinu superiór iha universidade balun iha Amérika, no balun iha Austrália, inklui mós balun oras ne’e iha deviza boot iha instituisaun F-FDTL no instituisaun Estadu seluk tan.

Richard akuzadu ho kazu pedofilia ka halo abuzu seksuál hasoru labarik minoridade.

Entretantu antes ne’e, Arsebispu Metropolitana Dili, Don Virgílio do Carmo da Silva, SDB, lihosi konferénsia imprensa iha Cámara Eclesiástica, Lecidere, Dili, subliña, entrega prosesu ne’e ba parte justisa hodi hatúr lia loos.

Kazu ne’e to’o mós iha Roma, Amu Papa foti ona desizaun hodi hasai Richard husi kargu nu’udar Padre.

Nune’e mós liga ho kazu ne’e, Don Virgílio mós deside ezonera Padre Herminio de Fátima Gonçalves husi kargu nu’udar Diretór Komisaun Justisa no Paz Dili nian.

“Ha’u nu’udar bispu deside atu ezenora amu Hermino de Fatima Gonçalves hosi nia kargu nu’udar Diretór Komisaun Justisa no Paz Dili nian tanba ligasaun ho kazu ida-ne’e. Ha’u deside atu hapara nia hosi servisu tanba ho razaun buat ne’ebé nia halo iha nia relatóriu hetan indíjiu ruma kona-ba alegasaun akuzasaun hasoru Ministériu Públiku nia investigasaun,” Don Virgílio hatete.

Richard atualmente kumpre hela prosesu judisiál (Termu Identidade Rezidénsia) iha Dili laran hodi hein prosesu julgamentu tuir mai kona-ba alegasaun kriminál hosi Ministériu Públiku.

Entretantu iha fulan kotuk, bainhira Xanana hala’o vizita ba Eis Padre Richard nia rejidénsia iha Dili hodi fó votus parabens ba nia aniversáriu ba-dala-84, mosu krítika manas iha públika tanba konsidera Eis Padre Richard nu’udar kriminozu ne’ebé la merese hetan atensaun husi Líder Nasionál hanesan Xanana.

Xanana nia oan mós hakerek karta ne’ebé públika husi nia ama Kirsty Sword Gusmão, preokupa tebes Xanana nia asaun ne’e.

Maske nune’e, mosu mós komentáriu seluk ne’ebé konsidera Eis Padre Richard sei inosente tanba só tribunál de’it maka bele kondena sidadaun ida ka hatúr lia loos ba akujasaun hotu liuhusi investigasaun ne’ebé klean.

Maske nune’e, ho baze lei kanóniku, Santasé ezonera ona Richard nu’udar Padre.

Antes ne’e, Atual Diretora Topu Honis, Liliana Tarung ba Timor Post konfesa, iha konspirasaun ne’ebé involve ema lubuk ida hodi hases Richar husi orfonatu Topu Honis. Meius barak ema halo hodi hamonu Richar maibé la konsege ikus mai ho akujasaun kona-ba pedofilia.

Tanba ne’e, Liliana hatete, entrega ba justisa atu hatúr lia loos.

Entretantu, Liliana mós haktuir, nia rasik mos kumpri ona julgamentu iha Tribunál Rejiaun Oekusi ba-dala-rua tanba hetan akujasaun oioin katak nia abandona no tortura labarik sira iha orfonatu.

Ho akontesimentu sira ne’e, Liliana reforsa katak, iha konspirasaun husi ema sira ne’ebé laran moras ba nia ho Richar durante dezenvolve orfonatu Topu Honis.

“Sira barak husi liur no na’in-ida eis Topu Honis ne’ebé la satisfeitu ho ha’u nia pozisaun agora (Diretora Topu Honis),” Liliana haktuir no dehan, ba tinan ida ne’e sura nia servisu iha Topu Honis durante tinan 26 ona. (cao)

No More Posts Available.

No more pages to load.