Xanana nia Kadeira Besik Lú Olo nia Sorin Kuanan, Alkatiri To’o Ikus Palásiu

by -150 views

DILI—Kadeira ne’ebé prepara ba diálogu entre líder istóriku no personalidade sira, ida ne’ebé mamuk tanba Kayrala Xanana Gusmão la marka prezensa. Kadeira mamuk ne’e iha kedas Prezidente Repúblika Francisco Guterres Lú Olo nia sorin kuanan.

Observasaun iha Sala Reuniaun Nino Konis Santana, Prezidénsia Repúblika, formatu kadeira haleu meza kabuar ida ne’ebé kompleta ho mikrofoni iha kada kadeira ida-idak.

Husi Lú Olo nia sorin kuanan, kadeira mamuk hela tanba Xanana  la partisipa iha reuniaun ne’e, tuir fali kedas Taur Matan Ruak, tuir Roque Rodriques, tuir Marí Bim Amude Alkatiri, tuir Lere Anan Timur no to’o iha sorin karuk Lú Olo okupa husi José Manuél Ramos Horta.

Líder hirak ne’ebé prezente hotu-hotu ho oin midar, hatudu ambiente amigavel tebes.  Hahú kedas husi observasaun Jornalista Timor Post bainhira líder sira ne’e ida ba ida tama ba palásiu, uluk liu maka Lere Anan Timur, no ikus liu maka Marí Bim Amude Alkatiri.

Bainhira líder na’in neen ne’e to’o iha palásiu, inklui Lú Olo, liu minutu hirak nia laran hein Xanana la mosu maka sira hahú tama ba sala reuniaun.

Tuir observasaun Timor Post ba lista prezensa, líder lima seluk ne’ebé Lú Olo konvida ba diálogu ne’e, hahú husi Lere asina uluk maibé la asina iha númiru dahuluk, Lere asina iha númiru daruak no tuir fali líder na’in haat seluk.

Kayrala Xanana Gusmão la partisipa iha diálogu ne’e ho rajaun tuir konfirmasaun ne’ebé Timor Post hala’o katak, hafoin partisipa entrevista espesial iha televizaun, Xanana aranka kedas ba Lospalos ho objetivu ba kari aifunan ba nia inan hakiak durante tempu rejisténsia, ho naran Jacinta de Jesus, iha Bauro, Lospalos, Munisípiu Lautem.

Xanana marka ajenda ne’e tanba bainhira nia inan haki’ak Saudoza Jacinta hakotu iis iha loron 24/01/2020, nia la partisipa.

Tuir ajenda, hafoin kari aifunan ba Saudoza Jacinta, Xanana sei halo vizita ba fatin istóriku sira iha Lautem no sei fila ba Dili iha loron Tersa (11/02/2020).

Entretantu Prezidente Repúblika Francisco Guterres Lú Olo konvida especial líder istóriku no personalidade na’in-neen atu halo reuniaun iha loron 10 Fevereiru 2020 hodi sira-nia hanoin kona-ba situasaun polítika-konstitusionál atuál.

Lihusi komunikadu ba imprensa ne’ebé Timor Post simu husi Palásiu Prezidensiál Nicolau Lobato, Dili, 05 Fevereiru 2020, haktuir, líder istóriku  no personalidade sira ne’e maka hanesan Eis-Prezidente Repúblika no Eis-Primeiru-Ministru  Kayrala Xanana Gusmão, Eis-Prezidente Ramos Horta, Eis-Prezidente no atuál Primeiru-Ministru, Taur Matan Ruak,   Eis- Primeiru Ministru Mari Alkatiri, Xefe Estadu-Maior-Jenerál F-FDTL, Majór-Jenerál Lere Anan Timur no veteranu Roque Rodrigues.

“Hamutuk ho líder no personalidade hirak ne’e,Xefe Estadu sei“halo análize no identifika opsaun sira ne’ebé di’akliu hodi hadi’a  situasaun polítiku-konstitusional atual”. Subliña iha komunikadu imprensa.

Reuniaun espesial ne’e hala’o relasiona ho rejeisaun Proposta Lei Orsamentu Jerál Estadu 2020, iha 17 janeiru tinan ida ne’e iha Parlamentu Nasional. Nune’e, Prezidente Repúblika uza kbiit husi  artigu 74 Konstituisaun RDTL, atu garante unidade Estadu no funsionamentu regular instituisoins demokrátikas.

Ho kbiit ida ne’e mak  Prezidente Repúblika halo diálogu tiha ona ho líder polítiku no entidade relevante sira tuir mai: Forum Organizasaun Sosiedade Sivíl oioin (FONGTIL), juristas, Igreja Katólika no konfisaun relijioza sira seluk, Câmara do Comércio e Indústria de Timor-Leste (CCI-TL)Conselho Combatentes da Libertação Nacional,  organizasaun rezistensia hamahon-an iha Konsellu Nasional Juventude Timor-Leste,  Centro de Estudo para a Paz e Desenvolvimento (CEPAD), Movimentu Asukai Lorosa’e noFORSAREPETIL  husi 23 janeiru to’o 07 fevereiru 2020.

Ikus liu Xefe Estadu mós sei rona no tetu hanoin sira hosi ninia órgaun konsulta – Konsellu Estadu,  molok foti dezisaun relasiona ho situasaun polítiku-konstitusionál ne’ebé oras ne’e Nasaun hasoru.

Prezidente Repúblika kompromete atu nafatin hala’o diálogu hodi rona hanoin husi lider no sidadaun sira atu ita hotu hamutuk lori polítika dezenvolvimentu  ba  povu tomak nia bem-estar no justisa sosial. Ba Povu no Nasaun nia di’ak, Prezidente Repúblika sei halo esforsu hotu-hotu. (cao/yto)

No More Posts Available.

No more pages to load.