Xanana Hakerek Karta ba Ingrid Bucens, Max Stahl To’o Dili Liu Fulan Rua Masakre 12 Novembru

by -738 views
Karta offisial ne'ebe Timor Post assesu, Kinta (28/10/2021).

Dili (Timor Post)—Xefe Negosiador Prinsipál Delimitasaun Fronteira Marítima Timor Leste, Kayrala Xanana Gusmão hakerek karta ba Ingrid Bucens nu’udar espoza Saudozu Max Stahl no família sira hodi hatoo sentidu kondolénsia.

Iha karta ne’e Xanana subliña, sente falta tebes ho Max Stahl nia mate tanba Saudozu konsideradu inspirativu i nia kontribuisaun ba luta libertasaun nasionál boot tebes.

Xanana subliña, ho Max Stahl nu’udar jornalista famozu ne’ebé ariska nia-an halo filmajen iha masakre Santa Kruz no ho filmajen ne’e nu’udar evidénsia injustisa iha momentu ne’eba mundu tomak hatene no muda Timor Leste nia destinu.

“Ha’u mós sei sente falta tebes ho Max ne’ebé ha’u admira tebes no ne’ebé sai hanesan inspirasaun ida mai ha’u durante tempu difísil balu iha ami-nia luta,” Xanana subliña iha karta ne’ebé Timor Post assesu.

Christopher Wenner koñesidu ho naran Max Stahl, moris iha 06 Dezembru 1954 no hakotu-iis loron 28/10/2021 iha Brisbane-Austrália, tanba moras kleur.

Estadu Timor Leste konsidera Max Stahl nu’udar eroi nasionál no kondekora ho Grau Colar Ordem Timor-Leste.

Max Stahl mai husi família diplomata, avo maternu diplomata Sueku, neebe hetan mos previlejiu sai hanesan Diretor Instituisaun Nobel liu tinan-20. Nia aman, Cristopher Max Stahl, diplomata Suisa no inan franseza ho maun-alin hamutuk nain tolu.

Tanba mai husi família diplomata, Max Stahl no nia maun-alin sira famíliar ho problema sira internasional no sempre muda husi nasaun ida ba nasaun seluk hanesan Bolivia, El Salvador, Austria no Inglaterra. Nia estuda literatura iha Universidade Oxford, Inglaterra no ko’alia fluentemente ingles, franses, alemaun, espanol, suesu no portugues. Nia mos hatene oituan koalia rusu no arabe.

Antes sai jornalista, Max Stahl hahu uluk nia karreira hanesan autor iha teatru no iha programa televizaun didika ba labarik sira, iha Inglaterra.

Nia vokasaun nuudar reporter funu hahu bainhira nia moris ho nia família iha El Salvador, fatin nia aman haknaar-an nuudar embaixador. No iha nasaun nee duni mak nia komesa halo reportajen kona-ba funu-sivil (guerra civil) neebe akontese entre 1979 too 1992. Husi nee ba oin, nia ba fati-fatin hodi relata kona-ba funu hanesan iha Chechenia, Jeorjia, Jugoslavia no too mai mos Timor-Leste.

Max Sthall nia hetan esperensia moruk oi-oin nuudar reporter funu sai dadur, haree nia maluk reporter sira mate iha nia sorin, moris susar ho gerileiru sira iha ai-laran, testamuna ba jenosidu no masakre hanesan akontese iha Semiteriu Santa Cruz Dili, iha 1991, neebe lori nia hetan premiu oi-oin no ida mak, Rory Peck Award, premiu ba operador kamara neebe arriska nia moris iha reportajen.

Hatan ba konvite husi kuadrus rezistensia Timor oan nian, Max Stahl ne’ebe haksumik-an nu’udar turista, sama-ain dahuluk iha Timor-Leste, iha loron-30 fulan-agostu 1991. Durante nia estadia, nia entrevista ho lider sira husi frente klandestina hanesan Komandante David Alex “Daitula”, Nino Konis Santa no selu seluk tan.

Max Stahl nia filme dokumentariu ho títulu: “ In Cold Blood: The Massacre of East Timor”, kona-ba masakre Santa Cruz, neebe nia rasik mak rejista militar Indonezia sira-nia brutalidade hodi oho joven-Timor oan sira, lao hadulas mundu no loke estadu barak nia matan hodi fo razaun ba Timor oan sira-nia luta atu ukun rasik an. Filmajen kona-ba Masakre Santa Cruz konsege lori sai ba liur ho tulun husi ativista Olandeza, Saskia Kouwenberg.

Luta ida neebe iha tinan-1999, lori fali Max Stahl fila mai Timor-Leste dala ida tan, hodi rejista Timor oan sira-nia sakrifísiu no reziliensia hodi hasoru dezafiu oi-oin, molok ho aten-brani determina liu husi referendum, atu sai hanesan nasaun-estadu, Republika Demokratika Timor-Leste, neebe formalmente rekonese  iha 20 maiu 2002.

Atu prezerva istoria luta Timor oan sira-nian, Max Stahl harii no jere rasik sentru arkivu audiovizual ho nia naran, Centro Audiovisual Max Stahl, neebe rejista akontesimentus istoriku neebe nia halibur durante tinan-25 nia laran. No arkivu sira neebe iha sentru nee, hetan mos rekonesementu husi Organizasaun Nasoens Unidas ba Edukasaun, Siensia no Kultura, UNESCO (sigla-inglês) hanesan “Rejistu ba Mundu nia Memoria”.

Ba fim edukasaun no investigasaun, Centro Audiovisual Max Stahl mos servisu hamutuk ho Universidade de Coimbra, Portugal, hodi arkiva-online dokumentus istoriku sira neebe sentru nee iha.

Estadu Timor-Leste rekonese Max Stahl ninia esforsu no dedikasaun hodi internasionaliza kazu Timor nian, iha tinan-2009, kondekora Mak Stahl ho Ordem de Timor-Leste ho Grau Insígnia. (cao)

No More Posts Available.

No more pages to load.