Xanana Ezizi Mate Isin Deskunfia Covid-19

husi -560 views
Lideransa Nasional, Kay Rala Xanana Gusmao haksesuk malu ho Ministra Saude, Odete Belo hodi tenki intrega mate isin Armindo ba familia

(Reportajem Jaime Pires/Editor Suzana Cardoso)

DILI (TIMOR POST) – Tanba seiduk serteza ho pazitivu Covid19 ba mate isin Armindo Borges (66) maka Lideransa Nasionál, Kay Rala Xanana Gusmão ezizi atu governu intrega mate isin husi Sala Izolamentu Vera Cruz, Caicoli ba familia.

Antes ne’e Xanana tenki haksesuk malu ho Ministra Saúde, Odete Belo iha Sentru Isolamentu Vera Cruz, Segunda, (12/4/2021) hodi husu mate isin Armindo Borges ne’ebé mate iha Domingu, (11/04/2021) kalan hafoin ran sai husi tilun, ain stroke no hasan bubu iha Hospital Nasional Guido Valadares HNGV).

Tuir familia nia deklarasaun hateten, Sabadu, (10/04/2021) tuku 19:00 OTL, Matebian Armindo Borges lori sai husi uma iha Bairru Kampu Baru, Aldeia Moris Foun “B”, Suku Comoro ho kondisaun grave.

“Moras ami nia Aman nian hahu ho hemu tua sabu halo liman-ain kolen. Sama rai lametin. Sama rai senti ain kman. Liu loron rua Apa nia kabun bubu. Soe bee boot ladiak maka bolu Dotour Joni mai uma haruka sona,” hateten ida husi oan feto Matebian Armindo liu husi video ho durasaun minutu 2:50 hodi husu tulun ba publiku para ajuda foti sai sira nia Aman Armindo husi fatin izolamentu Vera Cruz fo ba familia hakoi tuir lisan Timor nian.

Oan feto Matebian Armindo ne’e kontinua katak, husi sona ne’e maka soe bee boot mós diak. Liu tiha loron ida Matebian Armindo keisa fali moras hirus matan. Ho aimoruk tradisional tamung no senti kman.

Konta oan feto Armindo ne’e, antes lori mai HNGV senti ain maka moras. Lori hakneak maka hamrik. Iha tuku13:00 Domingu, (11/4/2021 tur lolos mate ona. Tanba moras makas ona; hasan kumesa bubu, ran sai husi tilun no liman-ain toos. Maibé kontinua lori mai HNGV ho esperansa bele hetan salvasaun.

“Too iha HNGV doutor sira koko liu-liu deit. Seidauk fo rezultadu mai ami familia, derepente dehan Covid. Husi HNGV telephone direta ba Vera Cruz. Lahateten familia, ho obrigatoriu sira lori mai isolamentu Covid19 iha Vera Cruz. Ami husu, doutor sira dehan nia (Matebian Armindo) kona moras Covid ho gejala-gejala stroke,” dehan oan feto Matebian Armindo ho mateben.

Iha parte seluk, maizu menus tuku 09:00 dader deit, Xanana mai Sentru Izolamentu Vera Cruz hodi ezizi tenki fo fila mate isin Armindo ba hakoi tuir lisan Timor nian. Labele lori ba hakoi ho moras Covid iha Metinaro.

“Ami la simu tanba dehan nia Covid-19. Nia moras fulan ida resin ona iha uma. Derepente lori ba ospital dehan covid-19 ona hakarak kontribui ba estadu hodi ko’alia ba populasaun kona-ba Covid-19, maibé la’os ho meius hanesan ne’e. Ami sei la simu ida ne’e,” protesta Xanana.

Xanana mantein iha Sentru isolamentu Vera Cruz too mate isin Armindo fo hatais ho kazaku. Tanba antes ne’e Xanana ameasa, karik lori ba hakoi iha Metinaru, maka sei ba sobu fali hodi lori mai entrega ba familia mak hakoi iha nia fatin tuir kultura Timor nian.

Too Ministra Saúde, Odete diretamente mai esplika ba Xanana no deskute malu. Ministra Saúde, Odete Belo mantein sira nia prinsipiu tuir protokolu saude, katak sei labele lori sai mate isin no labele entrega ba Xanana ho nia família.

“Lala’ok covid-19 nian mak hanesan ne’e duni. Ami la bosok povu no la bosok Xanana. katuas ne’e mate ba covid-19 duni tanba ninia imunidade mak hanesan ne’e duni no nia mate ba Covid-19 duni,” hateten Ministra Odete.

Aliende ho Ministra Odete, Xanana mós haksesuk malu ho mediku sira iha Ospital Vera Cruz no ejiji hakarak lori fila mate isin covid-19 ba ninia uma tanba tuir matebian la’ós mate tanba covid-19.

Xanana tun diretamente iha fatin izolamentu ospital Vera-Cruz hodi husu ba médiku sira atu lori fila mate isin ba ninia família. “Deskulpa maibé ami la simu, hau hein iha ne’e ha’u hamriik iha ne’e to’o mate mai ami lori ba uma,” dehan Xanana Gusmão.

Lider karismatiku ne’e subliña, sira hakarak halo hanesan ne’e atu ba ko’alia fali ba povu hodi povu fiar netik sira. Tanba Xanana rona, informasaun katak pasiente feto ida mate tiha uluk ne’e, mós moras kleur mak mate no ema balun dehan pozitivu loron haat- lima de’it fila fali ona no aimoruk paracetamol de’it mós la simu.

“Ha’u hakarak esklarese ba povu maibé ha’u hakarak buat hotu-hotu la’o dalan, labele Laclo tuir de’it WHO,” tenik Xanana hodi husu deskulpa no respeitu tebes protokolu maibé nia kontinua hein to’o bele lori fila mate isin ba ninia rezidensia.

“Ambulansia la tama, ami hamriik iha ne’e, ambulansia ba lori nia, ami mak tenke mate uluk, mak ambulansia foti, ambulansia kuandu lori, ha’u halo rahun tiha ambulansia ne’e tanba ami la simu, mak ne’e de’it, la’ós ami la fiar maibé ami familia mak la simu,” hakilar Xanana.

Tanba tuir Xanana, katuas ne’e (matebian) moras todan fulan ida ona iha uma, agora nia oan bei-oan sira isin di’ak hotu tanba saida mak nia covid-19. “Hanusa mak ha’u bele fiar, agora nia covid-19 nia oan no bei-oan sira isin di’ak hotu kedas,” tenik Xanana hodi liman hatudu familia sira ne’ebe hamrik haleu nia.

Xanana hamrik firme hodi dehan, ko’alia ba doutora Odete no doutor Rui, katak nia hein nafatin iha portaun izolamentu Vera-Cruz to’o lori mate isin ba ninia uma.(***)