Xanana Autoriza Mate Isin Konserva Iha Konzelador

by -161 views
Lider Nasional Kay Rala Xanana Gusmaõ manda hela kareta ne'ebé tula Konzelador hodi konserva Mate Isin Matebian Armindo, Foto Armenio

(Reportájem Florindo Coluna/Editor Suzana Cardoso)

DILI (TIMOR POST) – Atu mate isin Armindo Borges (66) ne’ebé mate iha Hospital Nasional Guido Valadares (HNGV) iha Domingu, (11/04/2021), labele estragus maka lider nasionál, Kay Rala Xanana Gusmão autoriza pedidu ekipa saúde hodi konserva mate isin iha konzelador.

Tuir observasaun Timor Post, maizu menus tuku 18:00 OTL, Tersa, (13/04/2021), Diretóra Jerál Ministériu Saúde, Odete Viegas hakat ba sala izolamentu Vera Cruz hodi husu autorizasaun husi Xanana no familia matebian para hatama mate isin ba konzelador hodi labele estraga mate isin.

Hafoin koordenador forsa tarefas prevensaun no mitiga Covid-19 ne’e hetan autorizasaun, kontaktu kedas ba ekipa saúde lori konselador tama ba sala izolamentu Vera Cruz ne’ebé rai mate isin.

Dau-daun ne’e maski seidauk hatama mate isin Armindo Borges ba kaixaun, maibé mate isin konserva ona iha konzelador. “Mate isin iha Segunda hatama ona ba polibek. Tanba ne’e Ministeriu Saúde (MS) ho Sentru Intregadu Jestão Krize (SIJK) tenki konserva Matebian isin di’ak ho hatama ba konzelador atu labele estraga,” dehan Odete.

Nia afirma, mate isin nia kondisaun liu tiha ona oras 24. Nune’e MS ho SIJK koordena tau kondisaun ne’ebé maka favoravel hodi hein ba solusaun sira ne’ebé maka sei deside iha tempu tuir mai.

Situasaun mosu katak dr. Odete, matebian ne’e mate ho Covid-19. No diagnostika ho moras stroke hemorrhage. Mai hospital ho kondisaun grave. Diagnostika tiha Covid-19 maka transfere mai fatin izolamentu.

“Fatin ida ne’e maka destinadu ba tratamentu ba Pasiente Covid-19 nian ne’ebé maka grave más infelizmente pasiente to’o iha ne’e mate,” katak Odete ne’ebé diferente ho familia katak matebian Armindo hakotu ís iha HNGV.

Iha parte seluk Xanana kontinua hein mate isin hodi toba tan iha Izolamentu Vera Cruz. Antes ne’e oan husi Matebian Armindo iha Segunda, (12/4/2021) madrugada ho tanis husu tulun atu lider kharismatik ne’e ajuda husu mate isin ba hakoi tuir tradisaun Timor nian maka Xanana kontinua toba hein to’o notisia ne’e hatun.

Desde maizu menus tuku 9:00 dader, loron Segunda, (12/4/2021) Xanana ho familia mai ezizi ba governu para fó fila mate isin ba familia hodi hakoi tuir tradisaun Timor nian, maibé tanba governu ulun moruk lakohi fó maka Xanana kontinua toba tan iha Izlomanetu Vera Cruz.

“Imi hotu sei iha ne’e, halo saida. Ba fila ba ona uma,” hakilar Lider Karismatiku Xanana ba ema hirak ne’ebé hamrik iha sala izolamentu Vera Cruz. (Akompaña notisia kompletu iha Diáriu Timor Post, edisaun, Kuarta, 14/04/2021).

No More Posts Available.

No more pages to load.