VMS Ho Ekipa Halo Konsulta Masál Iha Ermera

by -45 views
Foto Google

DILI (Timor Post) —Vise-Ministru Saúde, Bonifácio Mau Coli dos Reis, akompaña ekipa médiku hala’o atividade Konsulta Masál iha Munisípiu Ermera.

Konsulta masál ne’ebé hala’o iha munisípiu Ermera ne’e nu’udar kontinuasaun hosi komemorasaun loron saúde nasionál ba dalimak nian.

Vise Ministru Saúde hatete, konsulta masál ida-ne’e nu’udar estratéjia ida ne’ebé mala ministériu saúde halo atu lori ekipa saúde hakbesik ba komunidade sira iha area rurál sira hodi mellora saúde públika. Ekipa saúde ne’e envolve médiku jerál, médiku espesialista, enfermeiru, parteira, no mós farmásista, atu halo tratamentu no detesaun sedu ba moras ne’ebé komunidade hasoru liu-liu ferik, katuas no inan isin rua sira.

“Konsulta ne’e gratuitu, médiku sira sei halo diagnóstiku no halo tratamentu, di’ak liután mak komunidade sira mai hato’o sira-nia moras, atu ita-nia médiku sira halo detesaun sedu no halo kedas intervensaun, ita hotu hatene katak ho pandemia covid-19 ne’ebé iha Timor-Leste sofre mós ba moras ida ne’e, entaun afeta komunidade barak mak lakohi atu hakbesik-an ba fasilidade saúde sira, maibé liuhosi atividade ida hanesan ne’e ita bolu sira mai”, nia tenik.

MS halo ona konsulta masál iha munisípiu rua no ohin inklui tan munisípiu Ermera entaun hamutuk munisípiu tolu ke lori ona médiku espesialista hakbesik liután hodi halo konsulta ba komunidade sira, liu-liu ba ema hirak ne’ebé mak durante ne’e sofre hela moras hanesan moras fuan, diabetes, hepatitis, tensaun arterial, tuberkuloze no mós moras kankru.

“Durante ami-nia akompñamentu ami haree katak, iha munisípiu balu populasaun entuziazmu, maibé iha Ermera komunidade sira-nia partisipasaun menus tebes, tanba informasaun falsu ne’ebé mak sirkula iha sira-nia leet, katak ekipa saúde sira atu mai halo teste swab, maibé na realidade lae”, nia tenik.

Oportunidade ne’e Vise husu ba komunidade sira atu vizita beibeik fasilidade saúde, ema ida idak tenke badinas hakbesik-an ba fasilidade saúde.

“Hakbesik-an bá hodi halo check-up ka presiza atu hetan tratamentu, labele hein de’it moras todan mak bá, aleinde hetan tratamentu, nune’e mós rona informasaun hosi profisionál saúde sira relasiona ho moras ruma ne’ebé ema mak ita-boot sira sente”, nia haktuir.

Atividade konsulta masál iha Ermera ne’e hala’o durante loron tolu (28-30/7) no fatin tolu mak hanesan iha Suku Ermera ho partisipasaun komunidade hamutuk ema 227, Postu Administrativu Letefoho 470, no mós iha Kapitál Gleno hamutuk 137.

Ministériu Saúde iha ona planu ba tinan 2022 atu implementa atividade ne’ebé hanesan bá munisípiu 4 seluk ne’ebé mak laiha ospitál referral mak hanesan Munisípiu Lautem, Likisá, Manatutu no mós Aileu.

Akompaña mós iha atividade ne’e mak Prezidente Autoridade Munisipál Ermera, Esebio Salsinha, Diretóra Nasionál Kontrolu Doensa Doutora. Josefina Clarinha João.(*/fer)

No More Posts Available.

No more pages to load.