Vitor Moris Depende Ba Osan Terseira Idade

by -228 views
Vitor da Cruz, Foto: TP/Orlando Oki

Reportajen Orlando Oki

DILI (Timor Post) – Dadeer rai hun mutin sei falun hela ho maha-wen, hanoin ona atu ba buka osan dollar. Hadeer husi toba fatin uma Tasi-Tolu, hamoos matan, kose nehan no molok mata bixu prepara ona saku ho ai.

Mata bixu hotu hatais sapatu no foti bee moos tau ba masa litru lima nian, taka máskara iha ibun mak hahú sai husi uma ba fatin lixu sira.

Tau saku iha liman kuana no liman loos kaer hela ai hodi hakat ba lixu fatin ne’ebé butuk sasán aat oi-oin. Kaer ai iha liman sukit fo’er husi leten ba okos hodi buka kalén aat, besi arame, lata mamuk depois halibur hamutuk atu lori ba uma iha loron manas nakali nian.

Situasaun real ne’e la fasil ba ema hotu ne’ebé despreza sasán dodok, tanba iis. Maibé avó ida ho naran kompletu Vitor da Cruz ho idade 73, pasiénsia taka máskara iha ibun ho inus atu labele horon iis ne’ebé butuk iha fatin lixu.

Objetivu husi hili kalén aat sira atu sustenta nesesidade uma laran nian, tanba avó Vitor lakohi moris ho tane liman ba ema seluk. Maibé agora idade mós la’o daudaun ona entaun servisu buka kalén aat iha lixu paradu total.

Sente fraku ona. Maski uluk hala’o servisu hanesan Karpinteiru no la’o hale’u sidade Dili laran hodi hili kalén iha fatin lixu sira, maibé agora labele ona, no kona-ba han-hemu loron-loron nian depende de’it ba osan terseira idade.

“Ha’u nia idade mós avansadu ona, ha’u labele halo ona servisu. Ha’u agora hela  iha uma de’it, kona-ba han hemu loron-loron nian ne’e ha’u depedne ba osan terseira idade”, halerik avó Vitor ba Timor Post iha ninia rezidénsia bairru Besi-Mean, Tasi-Tolu, Sábadu (10/07).

Avó ne’e haktuir, momentu sei ativa fa’an lata, tetu lata mamuk kilo ida hetan sentavus $.0,10, besi aat kilo ida hetan sentavus $.0,25, maibé atu hetan osan barak depende badinas, tanba folin ki’ik hanesan ne’e tenke hili halo barak kedas mak tetu nune’e hetan netik $7 no $8.

Tuir nia katak, servisu hili kalén no besi tuan sira ne’e kuandu tetu hetan kilograma 1000 mak hetan $80, entaun osan sira ne’e bele uza ba han no hemu nian, maibé agora idade 73 ne’e labele ona.

Bazartete-oan ne’e uluk iha tempu Portugés nian hala’o servisu hanesan Karpinteiru depois para husi servisu ne’e deside hodi hatutan moris ho tetu kalén aat ho besi tuan sira ne’ebé soe iha lixu fatin to’o fulan Marsu 2021.

Hafoin akontese inundasaun iha loron 04 fulan Abríl 2021, avó ne’e deside hapara servisu hili kalén aat ho besi tuan sira ho razaun idade avansadu ona.

Tanba ne’e, agora avó Vitor ho nia kaben Leopoldina Oliveira no oan feto ikun, depende sira nia moris ba de’it osan terseira idade ne’ebé oferese husi governu hodi atende ba sira ninia nesesidade loron-loron nian.

“Ha’u ho ferik simu hotu osan terseira idade. Entaun fulan ida ami simu $300. Osan $300 ne’e ami uza ba han hemu loron-loron nian”, haktuir tan eis Karpinteiru ne’e.

Avó Vitor hatete nia parte katak, nia iha oan na’in haat maibé feto hotu. Mas oan feto na’in tolu kaben na’in ona no oan feto ikun mak daudaun ne’e sofre hela moras mental iha uma Tasi-Tolu.

Avó mane ne’e maski la hala’o ona servisu hili lata, maibé servisu loron-loron iha uma mak dudu karrosa hodi ba kuru bee moos, ba sosa modo no te’in tanba oan sira hela hotu iha munisípiu.

“Ferik tilun diuk no kona moras mental i oan feto ikun ne’e mós kona hela moras mental. Loron-loron ha’u mak ba sosa modo, kuru bee no ha’u mak te’in tanba sira na’in rua moras hotu”, hatete avó Vitor ho lian halerik.

Avó Vitor da Cruz, orijinál husi postu administrativu Bazartete, munisípiu Likisá no daudaun ne’e hela iha bairru Besi-Mean, aldeia 12 de Outubru, suku Komoro, postu administrativu Dom Aleixu, munisípiu Dili.

Nia konta, akontesimentu inundasaun iha loron 04 fulan Abríl, nia parte simu apoiu sasán hanesan foos, biti, lona, sanan no seluk tan husi governu no igreja maibé kona-ba osan to’o agora seidauk simu.

“Ekipa sira lori sasán mai ha’u, maibé ha’u dehan ba sira katak imi lalika lori sasán beibeik mai ha’u, tanba ida ne’e ita ezmola maromak. Tanba maromak hatudu nia kiak ba ita ema la’ós hatudu nia riku soin”, haktuir nia ho oin hamnasa.

Alien ne’e mós, Vitor informa, nia parte hetan subsídiu $200 husi governu iha tinan 2020, maibé kona-ba programa sesta bázika ne’e naran laiha entaun nia labele simu.

“Osan $200 ha’u hetan maibé kona-ba ai-han sesta bázika ha’u lahetan tanba ha’u nia naran laiha, entaun ha’u hirus mak lees tiha ha’u nia fixa família iha sira nia oin”, haktuir avó Vitor.

“Ha’u lees fixa família tanba forma loron tolu naran lasai ba subsidiu sesta bázika, maibé antes ne’e hetan subsidiu $200, depois iha sesta bázika ha’u lakon ha’u nia direitu”, hakotu nia. (Lee Notisia seluk iha Diariu Jornal Timor Post)

No More Posts Available.

No more pages to load.