Vítima Dezastre Naturál 4 Abril iha Laklubar Abandonadu

by -113 views
Mapa

Dili (Timor Post)Vítima dezastre naturál ne’ebé akontese tanba udan ho anin boot iha loron 4 Abríl 2021 afeta Timor laran tomak, iha Postu Administrativu Laklubar, Munisípiu Manatutu, Suku tolu (3) sidauk hetan atensaun hosi governu sentral.

Antonio de Jesus hanesan reprezentante Administradór Postu Laklubar hatete, populasaun sira ne’ebé afeta direta ba situasaun ne’e mai hosi suku Fatu Makerek, Sana Nain, Funar no Suku Barata,

“Ha’u hanoin situasaun iha Laklubar enjeral depois akontesimentu inundasaun iha loron 4 fulan Abríl  liubá to’o agora governu sidauk rekoñese”, Antonio hato’o iha okaziaun kuda ai-oan iha Laklubar, domingu, (14/11)

Na’i ulun iha postu nian ne’e dehan vítima ne’ebé hetan estragu iha inundasaun fulan Abríl liubá kuaze 300 resin,  balu hetan ajuda uitoan liu hosi ai-han sira ne’e iha, maibé kona-ba matéria atu konstrui sira nia uma labele. Ate ohin loron balu sidauk hela iha sira nia uma tanba tempu udan hanesan ne’e, mota komesa tun.

“Foin daudauk ami fó hanoin ba inan aman sira ho komunidade sira ne’ebé maka hela besik mota no besik rai monu tenke matan moris neon na’in. Dala ruma udan kalan ami la toba” haktuir autoridade.

Nia haktuir  hanesan reprezentante autoridade no komunidade sira hato’o nafatin  ba Governu sentrál oinsá  tau matan ba povu.

Iha  parte seluk estrada ne’ebé maka liga hosi  munisípiu mai  postu,  hosi postu ba iha suku  agora suku tolu maka bele asesu, suku tolu seluk sidauk  tanba to’o agora sidauk hetan apoiu hosi governu.

“Kestaun ne’e ami mós lahatene tanba saida, maibé afeta tebes ba komunidade sira ne’ebé baibain lori sira nia produtu ba iha merkadu, no afeta mós ba programa PNDS”, lamenta.

Tuir observasaun Timor Post komunidade iha terenu bainhira tempu udan sira labele halo movimentu tanba estrada ho kondisaun risku boot ba komunidade no transporte Laklubar. (mj4)

No More Posts Available.

No more pages to load.