Vise Ministru Justisa Nia Oan ho Karreta Xoke Malu iha Kolmera

by -937 views
Ilustrasaun

Jornalista Jaime Pires / Editór Noémio Falcão

DILI (Timor Post) — Vise Ministru Justisa, José Edmundo Caetano nian oan ho karreta xoke malu iha área Kolmera, Dili. Governante ne’e ba hato’o direita keixa iha Komandu Polísia Nasionál Timor-Leste (PNTL) Munisípiu Dili.

Ba jornalista sira iha Komandu Munisípiu Dili, Kaikoli, Dili, Tersa (12/10/2021), Vise-Ministru Justisa, José Edmundo Caetano rekoñese nia oan mak hetan asidente.

“Ohin dadeer ha’u nia oan mak lori karreta hetan asidente ki’ikoan ida, no sira deside ona atu mai rezolve ho família, maibé derrepente Mana ida asidente ne’e mós nia katuas oan mai baku ha’u nia oan sira ne’e mak sira kontaktu ha’u, ha’u tenke mai hato’o keixa,” José Edmundo haktuir.

Nia dehan, keixa ne’ebé nia hatoo atu autoridade sira halo prosesu legal ba kazu ne’e.

“Sim, labarik ne’e ha’u nia oan rasik mak hetan asidente ne’e, nia naran Andreas Heloi Caetano, asidente ne’e kuandu ita deside rezolve tuir família sasán ne’ebé mak a’at ita bele hadi’a, maibé mai halo fali violénsia integridade fízika ne’e labele,” José Edmundo hatete.

Entretantu Komandante Polísia Tránzitu Rodoviária Munisípiu Dili, Inspetór Domingos Sarmento Gama hatete, nia parte simu ona keixa relasiona ho asidente ne’e no sei prosesa tuir lei.

Polísia prende ona karreta rua ne’ebé hetan asidente no na’in ba karreta rua ne’e mós ekipa tránzitu investigasaun lori kedas ba iha Tránzitu Munisípiu Dili hodi kontinua halo investigasaun.

“Hamosu tan krime balun entaun hanesan halo agresaun fíziku ba ita nia motorista ida, entaun parte ida sente vítima ba agresaun fízika ne’e hodi mai hato’o keixa ne’e,” Inspetór haktuir.

No More Posts Available.

No more pages to load.